Andra Mari Zuriaren plazatik abiatu da manifestazioa eguerdiko hamabiak pasata. Ehunka lagun elkartu dira palestinar erresistentziak bake akordioa sinatu eta hilabete eta erdira “Su-eten faltsuaren aurrean palestinar erresistentzia aurrera!” lemapean. Mobilizazio bukaeran  plataformako kideek hartu dute hitza eta  palestinarrek jasaten jarraitzen duten egoera larria salatu dute. Bonbardaketak, erailketak eta blokeoak mantentzen direla azaldu dute, ia 500 palestinar erail eta milaka zauritu utziz su-eten akordioa sinatu zenetik.

Bake akordioa faltsutzat jo dute, eta “sionistek Estatu Batuen eskutik eta Mendebaldeko agintarien konplizitatearekin su-eten gisa saldu nahi digutena” garbiketa etnikoa mantentzea eta israeldarraren erasoak baimentzea duela helburu. Herri palestinarra sarraskiaren eta pixkanako genozidioaren artean aukeratzera behartuta dagoela ohartarazi dute.

Sionistentzat bi estatuen soluzioa inoiz ez dela aukera bat izan seinalatu dute eta haien asmoa garbiketa etnikoa gauzatzea dela. Bi estatuen soluzioa Israel legitimatzeko eta palestinar herria zokoratzeko trikimailua izan dela azaldu dute eta haien hitzetan, “soluzioa baino, arazoaren iturria da”.

Zatiketa plana sinatu zenetik 78 urte

NBEk Palestinaren partizio plana sinatu zuenetik 78 urte betetzen diren honetan, “bi estatuen irtenbidea hasieratik irtenbide faltsua zela” adierazi dute. Adierazi dutenez, sionistek lurraldearen %80a baino gehiago kontrolatzen dute gaur gaurkoz; Zisjordanian anexio plan berriak onartu berri dituzte, eta Siriako zein Libanoko lurrak okupatzen dituzte. Honetaz gain, NBEk estatubatuarrek Gaza okupatzea onartu berri duela salatu dute, eta horrela nazioarteko erakundeak “mendebaldeko potentzia inperialisten mesedetara” jardutea.  Sionistek palestinar erresistentzia deuseztatu nahi dutela azaldu dute, eta horretarako NBEk daukan zilegitasuna erabiltzen ari direla.

Bukatzeko, aditzera eman dute partizio plana eta 78 urte beranduago kalera ateratzeko arrazoiak are handiagoak direla, “1947ko partizioa salatzeko, eta partizioak eta genozidioak aurrera jarraitzen dutela salatzeko.”