Indar eta ilusio handiz ospatuko da larunbat honetan Zuiako X. Gazte Eguna
Urteurrena ospatzeko, asanbladaren, Orbanak taldearen eta Zuiako Bertso Eskolaren artean abesti bat sortu dute.
Uztailaren 13an, larunbatean, ospatuko da Zuiako X. Gazte Eguna, Murgiako plazan. Aurten, Batu, antolatu, ekin, 15 urte elkarrekin! lelopean antolatu dute eguna eta antolakuntzatik adierazi dutenez, “urtean egindako lana ospatzeko eguna da, urtean zehar gazte asanbladan ibiltzen garen gazteak elkartzen gara eta oso egun polita da”. Hala ere, jende berria hurbiltzeko aukera bezala hartu dute eguna eta horregatik ere kanpora begira erakargarria izan daitekeena antolatu dute aurtengo Gazte Eguna.
Urteurrena ospatzeko, asanbladaren, Orbanak taldearen eta Zuiako Bertso Eskolaren artean abesti bat sortu dute. “Zerbait berezia egin nahi genuen urteurrena ospatzeko, eta uste dugu emaitza oso polita izan dela: bertso eskolak letra idatzi du eta Orbanak taldeak melodia sortu du”.
Hona hemen sortutako abestia:
Egitarauari dagokionez, Gazte Eguna 11:30ean hasiko da Koadrilen arteko Gazte Olinpiadekin. Bertan edonork parte har dezake, baina 6 eta 8 pertsonen arteko taldeak osatu behar dira. Olinpiadetara apuntatzeko 671 11 97 32 telefono zenbakira mezua bidali beharra dago taldekide kopuruarekin eta taldearen izenarekin. Ekintza honetan apuntatzeko azken eguna uztailaren 11, osteguna, izango da. Olinpiaden finala bazkalostean burutuko da, hau da, 16:30ean eta saria egongo da.
Goizeko Olinpiadak eta gero Triki Poteoa antolatu da 13:30ean. Horren ondoren, bazkaria egongo da 15:00tan. Bazkarirako izena eman behar da Ioar tabernan edo zgaztetxea@gmail.com helbide elektronikoan. 8€ izango da langabetuentzat eta 10€ gainerakoentzat.
Arratsaldean zehar, 17:30ean hasita, Bertso saioa egongo da Ane Labaka eta Xabi Igoaren eskutik. Kontzertuak 20:30ean hasiko dira eta gurekin Paradixo, Eskean Kristo eta Bassagain Soinu Sistema izango ditugu. Kontzertuaz aparte, 23:00tan ekitaldia egongo da.
Antolakuntzatik azaldu dutenez, azken urteetan Gaztetxean ospatu izan da, baina aurten plazara berriro ateratzeko hautua egin dute: “Lan handiagoa suposatzen duen arren, uste dugu herriko plazan ospatzeak ikusgarriagoa egin dezakeela eguna”.
“Zuia bezalako udalerri txiki batean 15 urte betetzea lorpen handia izan da guretzat eta inoiz baino indar gehiago jarri dira gaztegun honetan”; horregatik, herriko jendea hurbiltzeaz gain garrantzitsua iruditzen zaie gainontzeko herrien babesa jasotzea. “Baina batez ere egun polita izatea nahi dugu, jendeak disfrutatzea eta indarberrituta ateratzea”.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
