Irratiko sarreran dagoen aldapatxoa bajatu eta txop txop entzun zen. Lurra urez beteta zegoen, erredakzioko ordenagailuak urpekaritza egiten, gabonetan ipini genuen egurrezko “tarima flotante” berria benetan flotatzen, eta gure estudioak tamaina ezberdinetako igerileku bihurtuta, akaso hauetako batean hidromasajerako aukera egongo da… tira, lehortzen zeuden landareak ez dira kexatuko behintzat.

Hasierako harriduraren ostean, laguntza deitu behar izan genuen. Udaltzaingoak etorri ziren lehenak baina askotarako balio ez dutela erakutsi eta laster egin zuten hanka irratitik.

Beranduxeago etorri ziren suhiltzaileak eta eskerrak hauek bestelako jarrera bat erakutsi zutela. Jolasteko gogoa ekarri eta igerilekura sartu ziren asko pentsatu gabe. Mangerak eta bonbak hartu eta orduak pasa zituzten gure lokala lehortzeko ahaleginak egiten. Lurra lehortzeko tresna bat ere utzi ziguten joan zirenean. Egunen batean itzuliko dizuegulakoan gaude, eskerrik asko ekipo! Suhiltzaileek ahal zuten guztia egin eta gero alde egin zuten. Bertan geratu ginen gu, bainujantzia soinean, fregona eskuan eta tresna elektronikoak lehortzeko tenderetea prestatzen.

Egoera honetan ulertuko duzue gure erritmoak nabarmen egin duela behera, barne tramite ugari daude orain egiteko eta lanerako ordenagailu gabe gaude. Itsasontzia urez betetzen ari bada ere, ezbehar guztien aurka nabigatzen jarraituko dugu, urteetan egin dugun bezala. Aukera ona da gogorarazteko Halabelarri egin zaitezketela irratia babesteko info@halabedi.eus emailera idatziz. Mila esker gure aldamenean egoteagatik eta beroa izanez gero etor zaitezkete Hala Bediko igerilekura zuen burua freskatzera!