Ertzaintzak bere bufandak eta arropa konfiskatu dituela salatu du Iraultza 1921 taldeak. Gertaerak aurreko igandeko partidan eman ziren. Ertzaintzak segurtasun dispositibo zabala ezarri zuen Mendizorrotzarako sarreretan, eta “lau harmailetan gazteak, adinekoak, haurrak, gurasoak eta familia osoak zehatz-mehatz eta bereizi gabe” arakatu zituzten. Honen helburua, Iraultza 1921 taldeko materiala konfiskatzea.

Duela bi hilabete “bere jarduera esparru guztietan” erreprimitua zela salatu zuen taldeak. Aurreko kasuan, Indarkeriaren Aurkako Batzordeak Mendizorrotza hilabetez ixtea eta 60.001 euroko isuna ezartzea proposatu zuen, estadioaren kanpoaldean Alavesen historia jasotzen duten hainbat mural aitzakia hartuta. Marko horren baitan kokatzen dute orain gertatutakoa. Kasu honetan, segurtasun arduradunek hartutako erabakia Ertzaintzako agintarien erabakia izan dela seinalatu dute zaletuek. “Polizia agintariek lasaitasuna eta ordena zegoen lekuan kaosa sortu dute, suhiltzaile piromano baten antzera”, azpimarratu dute.

Iraultza 1921 taldeak gogora ekarri du 2012tik legez erregistratutako elkarte bat dela, eta nortasun juridiko propioa duela. Azaldu dutenez, ez dute “inolako jakinarazpen ofizialik jaso” taldea “legezkotasun zalantzagarriko zerrenda” baten parte dela esanez, eta ez zaie aukera eman beren defentsan alegazioak aurkezteko.

Eraso honen helburua “alaveszaleoi gure gizarte masaren zati handi baten adierazgarri diren zortzi letra eta lau zenbaki lapurtzea” dela adierazi dute. Honen aurrean, Iraultzak argi erantzun du: “Debekatutako zortzi letrak eta lau zenbakiak eta harrotasunez ordezkatzen dituzten pertsonak Mendizorrotzan jarraituko dute egoten, beraien etxea eta alaveszale guztiona baita”.