Europara begira | Hibai Arbide kazetaria, pertsonen trafikoa egitea leporatutako suhiltzaileen absoluzioaz eta Rouvikonas talde anarkistaz

Europara begira | Hibai Arbide kazetaria, pertsonen trafikoa egitea leporatutako suhiltzaileen absoluzioaz eta Rouvikonas talde anarkistaz

Europara begira jartzen gara astean behin, eta Hibai Arbide kazetariaren txanda izan da gaur. Atenas eta inguruan gertatzen denaren berri ematen digu kazetariak hilean behin, eta gaur Lesbosen egindako epaiketa bat izan du hizpide: Proem Aid elkarteko bi suhiltzaile sevillar absolbitu zituzten atzo bertan, pertsonen trafikoa egitea leporatuta epaitu ostean.

Gainera, Rouvikonas talde anarkistari elkarrizketa egin berrio dio Arbidek: Greziako talderik ezagunena da eta aurki egongo da ikusgai elkarrizketa jasotzen duen bideoa Telesur katean. Estreinatu aurretik, baina, aurrerapen txiki bat egin dio HIZPIDEA magazinari.

“Biktimen oroitzapena” -Josean Bueno-

“Biktimen oroitzapena” -Josean Bueno-

Azken hilabeteetan Gasteizen hainbat ekitaldi xumek gerra zibilean eta ondorengo frankismopean sortutako biktimak ekarri dute gogora. Santa Isabel hilerriaren ondoan egin zen lehena, bertan fusilatutakoak oroituz. Hiriaren beste lekuetan ere egin dira honelako ekintzak: Karmen komentuaren ondoan eta Sagrado Corazón ikastetxearen ondoan, bi eraikuntza hauek espetxe izan baitziren errepresio frankistan. Monumentua ere jarri da Posta eta Agirre Lehendakariaren kaleen artean, Korreos plazatxotik gertu. Gasteizen ere, beste lekuetan bezala, erregimen frankistak mendeku latza hartu zuen beren etsai politikoen aurka, euskal nazionalisten aurka, errepublikarren aurka, ezkerreko jendearen aurka. Teodoro Gonzalez de Zarate Gasteizko alkate izandakoaren gorpua duela gutxi berreskuratu zen, beste gorpuekin batera, Azazetako mendatean errepide ondotik.

2017 urtean Oroitzapen Historikorako Plana onartu zen Gasteizko Udalean, eta horren segida dira ekitaldi hauek. EH Bilduk, EAJk, PSEk, Podemosek eta Irabazik adostu zuten plan hau. Memoriaguneak ezarri dira faxismoaren biktimak oroitarazteko eta omenaldia egiteko. Ondo iruditzen zait, nola ez!

Baina hau guztia ikustean zera datorkit burura: kontxo, bazen garaia! Franco 1975 urtean,  duela berrogeita bi urte baino gehiago hil zen; ohean, lasai, hori bai, baina duela hamarkada batzuk. Orain arte zergatik ez da egin honelako ekitaldirik? Hainbat lekutan oraindik dabiltza, gaur egun, 2018an kaleen izen frankisten inguruko eztabaidan. Bada luzea frankismoren itzala! Baina, itzul gaitezen galderara: zergatik oroitzen dira orain biktima horiek?

Nik uste dut arrazoia aurkitzeko beste biktimei begiratu behar zaiela. Hain zuzen ere azken urteetan protagonismo politiko eta mediatiko zabala izan duten “terrorismoaren biktimei”. Biktima horiek konpentsazioak, omenaldiak eta errekonozimendua izan dute; ez dut nik esango hori guztia ez dela egin behar. Baina horien errekonozimenduaren argitara oso argi, eta lotsagarri, geratzen da frankismoaren biktimei hamarkadetan egin zaien ezikusia. Biktima batzuen errekonozimendu publikoa beste biktima batzuen errekonozimendu publikoaren itzaletik datorrela esango nuke nik.

Eta horrek zer pentsatu ematen du. Nork markatzen duen agenda? Nork sortzen duen “errelatoa” eta nola? Noraino den zintzoa biktimekiko elkartasuna eta noraino den interes politikoaren araberako propaganda joera? Injustizia eta biolentzia baten biktima guztiak berdinak dira?

Frankismoaren biktimei eginiko monumentu xumea begiratzen dut Korreos ondoan; bazter batean dago, plaka bat lurrean eta bi-hiru metroko altuerako burdinak. Ederra da, gustatzen zait. Baina justu atzean ikusten dut Banco de España eraikuntzaren itzal zabala, hainbat altueratako eraikuntza dotore-dotorea. Bertan urtean daramatzate milioiak inbertitzen terrorismoaren biktimen oroitzeko zentroa sortzeko. Izkina horretatiko argazkiak mila iritzi zutabek baino gehiago balio du: bi memoria, bi monumentu.

Josean Bueno Saez de Albeniz

Ahalduntze ariketa egingo dute Gorbeialdean eta Aiaraldean, datorren igandeko herri galdeketetan

Ahalduntze ariketa egingo dute Gorbeialdean eta Aiaraldean, datorren igandeko herri galdeketetan

Datorren igandean, maiatzak 6, egingo dituzte herri-galdeketak Aiaraldeko Artziniega, Aiara, Amurrio, Okondo eta Laudio herrietan eta Gorbeialdeko Zigoitian eta Zuian. Miren Ayesa Gure Esku Dago ekimeneko Arabako koordinatzaileak adierazi du prozesu ahalduntzailea izan dela orain artekoa, eta datorren igandean izango duela puntu gorena. Herritarrak parte hartzera deitu ditu, baita kanpokoei gonbita egin ere, erabakitze eskubidearen festan parte har dezaten.

Bestalde, erabakitzeko 2019 arrazoi biltzen jarraitzen dute Gure Esku Dago ekimeneko kideek, baita ekainaren 10eko giza-katea prestatzen ere.

“Ez dezagun hutsik egin” -Oier Azkarraga-

“Ez dezagun hutsik egin” -Oier Azkarraga-

Maiatzaren 6an Gorbeialdeako Zuia, Zigoitia eta Aiaraldeako herrietan burutuko dira Herri Kontsultak Gure Esku Dago taldeak antolatuta. Ez da lehenengo aldia Araban horrelako kontsultak antolatzen direna, Gorbeialdeako hainbat herritan egin izan dira aurrez, bereziki nabarmentzekoa delarik Aramaion egindakoa erroldaren erdiak baino gehiagok independentziari bai esan ziolarik.

Lehenengo kontsultak ez badira ere, garrantzi bereziko data izango dugu Maiatzaren 6koa, Araban inoiz egin den Herri Kontsulta handienak izango baitira, inoizko herritar kopuru handiena deituta baitago hautestontzietara.

Gorbeialdeako herrietan, eta baita Araba osoan ere, aspaldi gaude egun honi begira, Gure Esku Dago sortu zenetik, ekintza ugari egin dira erabakitze eskubidearen alde, Durango eta Iruñea lotu genituen, Gasteiz bete genuen eta gure txikitasunean ere, plazak eta kaleak bete izan ditugu.

Baina indar erakustaldietatik haratago, Gure Esku Dagok txikitasunean eragin du, galduta zeuden aliantza eta konfidantzak berreskuratzen lagundu digu, jende berria batu dugu bidera eta ilusioak piztu ditugu, bide amankomun batetan aurrera urratsak emanez, tentuz, prisarik gabe, ahotsa altxatu gabe, egin dugu honainoko bidea.

Bide horretan ikusi dugu eliteetan eta nazional mailan ezinezkoak direnak, posible direla hurbiltasunean. Rafa Diezek aipatzen duen bezala, ez dago eliteen arteko Maltzagarik, baina Maltzagara heldu gaitezke, herrietan egiten dugun lanaren bitartez, bide orriak zehaztuz eta mugariak markatuz. Jakin badakigu, posizio batzuk mugiaraztea zaila izango zaigula eta autonomismoan anklatuta daudenak nekez mugituko ditugula Euskal Estatuaren aldarrikapenera. Bide horretan ordea, urrats batzuk ematera eraman ditzazkegu eta horietako bat da, Maiatzaren 6an burutuko duguna.

Horrelako kontsulta bat antolatzea ez da ohituta gauden bestelako ekimen bat antolatzea bezala, sukalde lan handia behar du eta horretan murgilduta egon gara herrietako talde motoreetako kideak. Eragile legal bat sortu, papeleoak egin, sinadurak jaso, sinadurak aurkeztu, hauteskunde araudiak bete… traba ugarirekin ere topatu izan gara bidean, zentsoak izateko ezintasuna, eta hortaz, bozkatu behar dutenen zerrenda zehatzak izateko ezintasuna, muga legalak… estatuak ez baitu kontsulta hauen zilegitasuna aitortzen, baina gu mundu mailan behar diren gardentasun parametro guztietan kokatzen baitugu, ez dezaten inolaz ere, dugun zilegitasuna zalantzan jarri.

Galdera aukeratzea ere eztabaidaz jositako bidea izan da, eta eztabaida horiek bideratzeko gaitasuna izateak ere aurrerantzean lagunduko digu. Ideia hau laburbiltzeko, bi posizio nagusi zeuden galdera aukeratzeko momentuan: bata erabakitzeko eskubidearen ingurukoa litzateke, galdera bera eskubide hori dugun edo ez jartzen zuen eztabaidagai. Beste aukerak, eztabaida hori gainditutzat eman eta zuzenean Euskal Herri burujabeaz jarduten zen.

Eztabaida hauek, marko ideologiko eta politikoen gainetik, zentzudunera eramanez, eta horrela kontsentsuaren bidez gainditu izanak, konfidantzak indartu ditu. Ez da izan gehiengoaren erabaki soila, guztion ulermenarekin egindako bidea baizik.

Ekimen honek beste onura batzuk ere ekarri dizkigu, azkenaldi honetan aldarrikatzen ari garen lan molde eta militantzia eredu berriekin bat egiten duen dinamika da, eta filosofian hain argi baina praktikan hainbeste kostatzen zaigun horrekin bat egiten du guztiz. Hau da, lortu izan dugu herri masa handien aktibazioaren bitartez aurrera eramatea lan hau, auzolanaren bitartez antolatzen, bakoitzak nahi duen bidetik eta nahi duen heinean ekarpena eginez eta ekarpen guzti horiek baliogarriak direla ulertuz eta ulertaraziz.

Aktibazioan ez ezik, herri sektore zabalen ideologizazioan ere baliogarria izan da bide hau, orain artean alderdi oso ezberdinen orbitetan zeuden kideak edota ideologizatu gabe ere zeuden herri sektoreak batuz eta lanean jarriz. Jende hori lanean mantentzea lortzen badugu eta beste sektore batzuetan inplikatzea lortzen badugu, Herri Mugimenduarentzat aktibo politiko handiak lortuko genituzke.

Maiatzaren 6a, eta harekin Gure Esku Dagoren dinamika osoa beraz, onura handiak ekarri dizkigu herrietan, baina ezin dugu ahaztu zertaz ari garen: Maiatzeko lehen igandean egingo duguna, erabakitze eskubidearen aldeko aldarrikapenetik haratago, Euskal Estatuaren aldeko ekimen erraldoia izango da, egun horretan herriz herri ehunka herritar kalera atera eta herri berri bati BAI esatera goaz.

Bide honetan independentziaren alde lerrokatzen garenok, argi eduki behar dugu zer den guretzat garaipen bat, beste guztia porrot bat izango ez bada ere. Gakoa ezin da ehunekoetan jarri, jende mobilizazioan baizik, baina gure herrikideen erdiak baino gehiagok independentziaren aldeko hautua egingo balu, Euskal Estatuaren poiektua gauzatzea askoz gertuago izango genuke.

Maiatzaren 6an beraz, Arabako herritarrok zita garrantzitsua dugu, bai bozka ematera deituak gaudenak, baita babesa emateko aukera paregabea dugunok ere. Zentsu horretan Arabar guztiak deituak gaude egun horretan plazak eta urnak betetzera. Ekainaren 10ean ere, Araba zeharkatu eta Gasteizen amaituko den giza katea dugu. Badira bi zita garrantzitsu hurrengo aste eta hilabeteetan erabakitzeko eskubidearen aldarrikapenari lotuak, ez dezagun hutsik egin!

Oier Azkarraga

Ivan Santamaria: “Etorkizunerako pentsio-sistema sendo bat nahi dugula erabakitzen badugu, aberastasuna beste modu batera banatu beharko da”

Ivan Santamaria: “Etorkizunerako pentsio-sistema sendo bat nahi dugula erabakitzen badugu, aberastasuna beste modu batera banatu beharko da”

Azken urteotan pentsio-sisteman egindako erreformak izan ditu hizpide Ivan Santamaria kazetariak, EAJk PPrekin erdietsitako akordioaren haritik tiraka. Santamariak zalantzan jarri du egungo pentsio-sistema, gazte kotizatzaileen eta pentsiodunen arteko desoreka aintzat hartuta. Hala ere, sistema hori aldatzea erabaki baten menpe egonik, kotizatzeko modua eta, beraz, pentsioen etorkizuna bermatzeko bidea ere egin daitekeela uste du kazetariak.

“Itxaropena dut herri honek memoria oso bat idatzi nahiko duela, askotariko errelatoekin, eta hor egongo da tortura, letra larriz idatzita”

“Itxaropena dut herri honek memoria oso bat idatzi nahiko duela, askotariko errelatoekin, eta hor egongo da tortura, letra larriz idatzita”

Argazkia: Berria

Eneko Compains 2010eko irailean atxilotu zuten eta orduan salatu zituen torturak, baina salaketa artxibatu egin zuten. Iaz, berriro irekitzeko agindu zuen Espainiako Auzitegi Konstituzionalak, eta lau guardia zibili deklarazioa hartu zieten atzo Iruñeko auzitegian.

Compainsek adierazi du ez duela konfiantza handirik epaian, baina bai euskal gizartearengan: gizarteak berak ipiniko du torturaren auzia behar duen lekuan, eta biktimek behar duten aitortza izango dute.

“Erasotuaren sinesgarritasuna ezbaian jarri da berriz, eta hori da jendartearen isla: patriarkatuarekin egiten dugu topo etengabe”

“Erasotuaren sinesgarritasuna ezbaian jarri da berriz, eta hori da jendartearen isla: patriarkatuarekin egiten dugu topo etengabe”

2016ko sanferminetako talde-bortxaketari buruzko epaia eman zuten atzo: 9na urteko kartzela zigorra ezarri diete 18 urteko neska bat atari batean bortxatzea leporatzen zieten bost gizonei. Epaiak amorrua piztu du, izan ere bortxaketaren xehetasunak ematen ditu, baina hori ez dator bat emandako azken ebazpenarekin. Irati Gonzalez Euskal Herriko Bilgune Feministako kidearekin aztertu dugu epaia bera zein ondoren egindako protestak. Justizia-sistemari buruz hausnartu beharraz mintzatu da Gonzalez, eta biktimaren hitza zalantzan jartzea kritikatu du.

“Ziztadak zizt” -Alaitz Andreu-

“Ziztadak zizt” -Alaitz Andreu-

Astelehenean jakin nuen ostegunean emango zidatela emaitza, eta astelehenetik eduki dut ezinegon moduko bat gorputzean sartuta, bularraldean ziztadaka, gora eta behera saltoka. Badakit, lehenengo pertsona singularra erabili dut, pluralaren ordez, eta mediku-azterketa baten emaitzaz edo hipotekaren onarpenaz ari naizela dirudi, baina ez da horrela. La manadaren epaiaz ari naiz, bai, eta oso neure sentitu dudalako hitz egin dut singularrean.

Emakume izendatutako gorputz honen bizitzaren zati ere badelako epaitegi horretan gertatu dena. Ebazpen horrek nire eta inguratzen nauen gizarte osoaren gorputza egituratu duelako, pixka bat gehiago. Gizartean nagusi diren diskurtsoek egiten baikaituzte.

Haurrak garenean autoei eduki behar diegun beldur berbera eduki behar diegu emakumeok gizonei; hau da, errepidea gurutzatu gabe espaloietan edukitzen gintuen beldur horixe, baina ehun aldiz biderkatuta. Hori bai, gizon ezezagunei eduki behar diegu beldurra, nahiz eta hurbilekoek egingo eta egiten diguten kalte handiena.

Bada, beldur edo, hobeto esanda, ikara horrek gidatu behar ditu gure ekintzak, gure bizitza. Horregatik epaitzen dira goizeko lauretan etxera zihoala bortxatutako edo minigona jantzita tabernako mahai gainera igota dantzan ibilitako emakumeak. Beldurrak gidatzen ez gaituela dirudienean, gizonek egin diezaguketenaren erantzule bihurtzen gaituzte emakumeak.

Sexu-ikara esaten zaio beldur horri; horren eraginez, emakumeok gizon ezezagun guzti-guztiei edukitzen diegu beldurra toki ilun edo bakartietan. Guztiei, gizon guztiak direlako bortxatzaile potentzialak gizarte honetan.

Egituraz, gizartearen erdiak ikara dio beste erdiari, eta, besteren artean, horretaz elikatzen da sistema. Aldi berean, gainera, indarkeria erabiltzeko aukera ukatzen digu sistema horrek, eta, ondorioz, zalantza egiten dugu geure burua babesteko orduan ere. Askotan entzun edo sentitu izan dugun paralisi horri buruz ari naiz, bai. Beldurti eta babesgabe nahi gaituzte, beren boterea ukitu ez dezagun.

Gizonei beldurra eduki behar diegula esaten digun sistema horrexek esaten digu, ordea, egitura instituzional eta judizialen bidez, erasotzen gaituztenean aurre egin behar diegula. Aurre egin ezean, erasoa bera jartzen da zalantzan, eta, bestela, edo, gainera, geuri egozten digute errua: zer egiten zenuen ordu horretan hor eta bakarrik.

Beraz, gizonek beldurtu egin behar gaituzten sistema politiko honetan, atari batera sarrarazten nauten bost gizonkotek ikaratu egin behar nautela onartzea litzateke zentzuzkoena. Baina ez. San Ferminetan gertatutako erasoan intimidaziorik eta indarkeriarik egon ez zela argudiatuta erabaki dute epaileek San Ferminetako bortxaketa ez zela bortxaketa izan. Zergatik eta bost gizon heldu eta sendo ez omen direlako nahikoa intimidazio bere baitan. Zergatik eta indarkeriarik ezartzen omen ez delako zakilak baimenik gabe ahotik, alutik eta uzkitik sartzen dizkizutenean.

Lehenengo pertsonan hitz egin dut, epaiak nirekin zerikusi zuzena balu bezala, halaxe delako. Ni ere epaitu nautelako hor, eta baita zu ere, emakumea bazara edo gizarteak emakumetzat bazaitu. Gorputz are babesgabeagoa egin zuten atzo nirea, bat-batean.

Astelehenetik egon naiz emaitzaren zain, ezinegona ziztadaka nuela, ziztadak azkenean beste zulo bortxagarri bat egin didan arte. Zizt.

Alaitz Andreu

Datorren igandean, hilak 29, iritsiko da Gasteizera Mugak Zabalduz EH karabana

Datorren igandean, hilak 29, iritsiko da Gasteizera Mugak Zabalduz EH karabana

Europaren praktika politiko eta ekonomiko neoliberealak salatzea helburu hartuta, Euskal Herria zeharkatuko duen karabana abiatuko da bihar Hendaiatik Bilbora. Pertsonen zirkulazio librea eta guztiok eskubide berberak izatea aldarrikatuko dituzte, besteak beste, Andoainen, Iruñean, Bardeetan eta Santurtziko portuan geltokiak egingo dituen karabanak. Gasteizera iritsiko da apirilaren 29an, eta eskola-segregazioa eta kultura arteko elkarbizitza izango dituzte ardatz. Bilboko San Frantzisko auzoan amaituko da karabana astelehenean, portuan eraikitzen ari diren harresia salatu ondoren.

Udal ordezkarien tertulia: biolentzia matxista, bus elektrikoa, Gaztetxeak 30 urte eta Mozal Legea

Udal ordezkarien tertulia: biolentzia matxista, bus elektrikoa, Gaztetxeak 30 urte eta Mozal Legea

ARABA HIZPIDEko osteguneroko tertulian, udal ordezkariek hartu dute lekukoa gaur. Gasteizko gaiei buruz jardun dira Ane Aristi, EH Bilduren izenean, eta Alvaro Castillo, EAJren izenean: biolentzia matxista, bus elektrikoa (bus azkar adimenduna), Gaztetxearen 30. urteurrena eta Mozal Legea izan dituzte hizpide.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies