Udal ordezkarien tertulia: aurrekontuak, tranbia eta Gure esku dagoren galdeketa

Udal ordezkarien tertulia: aurrekontuak, tranbia eta Gure esku dagoren galdeketa

Osteguneroko tertulian, udal ordezkarien txanda izan da gaur. Aitor Miguel EH Bilduko ordezkaria eta Gorka Iturriaga EAJkoa izan dira gau ARABA HIZPIDEn, udal kontuek buruzko eztabaidan. Udal aurrekontuen negoziazioak hartu du tertuliaren zatirik handiena, baina bestelako gaiak jorratzeko astia ere hartu dute politikariek: tranbiaren hegoalderako zabalpenean egindako moldaketak eta Gure esku dago ekimenak Gasteizen galdeketarik

Entzun
Aitor Idigoras (Steilas): “Gure grebak baino, askoz kalte handiagoa eragiten du ikasle batek 5 egunez tutorerik ez izateak”

Aitor Idigoras (Steilas): “Gure grebak baino, askoz kalte handiagoa eragiten du ikasle batek 5 egunez tutorerik ez izateak”

Sektorekako grebak egiten ari dira hezkuntzako langileak joan den urriaren 28tik, “Lan baldintzak hobetu. Hezkuntza eraiki” lelopean. Hezkuntzara EAEko Barne Produktu Gordinaren % 3,5 bideratzen da, eta hori igotzea eskatzen dute ELA, LAB eta Steilas sindikatuek, gainerako aldarrikapenak horren bitartez ere asetuko direlakoan. Aitor Idigoras Steilas-eko kideak adierazi duenez, EAE eta Nafarroa Europako azken postuetan daude hezkuntza-inbertsioari dagokionez.

Entzun
“Basakeria” -Jaione Agirre-

“Basakeria” -Jaione Agirre-

Iruñean basakeria bat ari dira epaitzen.

5 pertsonek beste pertsona bati egin zioten basakeria.

5 pertsona horiek diote ez zela basakeria, besteak onartu egin zuelako eta gogoz parte hartu zuelako. Hori frogatzeko bizitza normala, alaiegia daramala orain.

Betiko moduan basakeriaren biktima da erruduna. Okerreko lekuan zebilen eta okerreko gauzak egiten.

Lapurreta batez ari bagina ez zen halakorik esango, baina basakeria jasan duena emakumea da eta bortxaketa batez ari gara.

Gogoz parte hartu bazuen, zergatik kendu zioten mugikorra inori konta ez ziezaion? Laguntza eska ez zezan ez bada? Noraino iritsi behar zuten basakeria izateko? Erahiltzeraino? Zoritxarrez hori ere gertatu zen duela urte batzuk beste San Fermin batzuetan…

Basakeriaren egileek beraien artean pasatako mezuek adierazten dute ez zutela onartzen ezer txarra egiten ari zirenik, gogotsu kontatu zutela egindakoa. Nahiz bi aritu lanean ustez besteak babesteko erakundeetan.

Asko gara basakeria hau gaitzesten ari garenak lagunartean, kalean eta medioetan. Beldur naiz ez ote garen fededunen artean predikuan eta, hala ere, esateko beharra sentitu dut nik neuk ere.

Gaurko iritzi atalean ez dut ezer berririk esan. Beste askok esan dutena errepikatu dut eta seguruena traketsago, baina ea errepikatzearen errepikatzeaz konturatzen garen, behingoz, basakeria bat izan zela 5 gizon haiek emakume bati egin ziotena. Hurbilekoa eta egunerokotasunean basakeria txikiagoekin justifikatzen dela zoritxarrez.

Ea horrela, emakumeak gutxiago ez garela ulertu baino, barnera dezagun guztiok.

Jaione Agirre

Entzun
Europara begira: Madrileko mugimendu feministaren indarra (Oihan Vitoria)

Europara begira: Madrileko mugimendu feministaren indarra (Oihan Vitoria)

Astean behin Europako mutur batetik bestera ibiltzen gara ARABA HIZPIDEn, eta Oihan Vitoriaren txanda izan da gaur. Joan den azaroaren 25ean indarkeria matxistaren aurkako eguna izan zela aitzakia hartuta, Madrilen mugimendu feminista hartzen ari den indarraz eta egunaren inguruan zein horren aurretik egindako mobilizazio jendetsuez aritu gara berarekin.

Entzun
“Talde lana” -Alaitz Amundarain-

“Talde lana” -Alaitz Amundarain-


Talde lana ezinbestekoa da. Ezinbestekoa egunerokoan helduen artean baita gazteagoen artean ere. Baina benetan, ba al dakigu elkarrekin lan egiten? Aurreko astean, EAEko ikasleak estatu espainiarreko ikasle guztien artean talde lanean okerrenetarikoak direla jakin genuen. Hori da, PISAk dioena. Nahiz eta PISAri bakarrik kasu egitea ez den egokia, garrantzitsuak diren beste balore batzuk ez baitituzte baloratzen, emaitza hauek pentsarazi egin digute.

Emaitza hauek jaso aurretik, hezkuntzan ari garen asko gai horri buelta bat eman nahian ari ginen. Ikasleak eta gurasoak ere kexaka entzuten ditugu. Ikasleek diote arazoak izaten dituztela talde lanetan normalean. Askok ez omen dute haien zatia egiten. Hori dela eta, beste batzuk egin behar izaten omen dute bakoitzari tokatzen zaion zatia eta lana egin ez duen ikaslearen lana. Badira ikasle batzuk besteen lanak egokiak ez direla pentsatzen dutenak eta lan guztia aldatzen dutenak besteen lana gutxietsiz. Gurasoek, berriz, haien seme-alabek besteen zatiak ere egiten dituztela diote eta ikaragarrizko lan karga dutela, eta askotan giro txarra beste kideekin.

Irakasleok, berriz, zatika egin dutela diogu. Ez dutela taldean lan egin eta kasu askotan, besteek egin duten zatia irakurri ere ez dutela egiten. Batzuetan, letra ezberdinekin ere aurkezten dituzte lanak. Zatika lan egitea, ordea, ez da taldean lan egitea. Inork ez die, ordea, ikasle hauei talde lanean lan egiten erakutsi. Irakasleek izan beharko lukete talde lanean gidari. Baina, nork erakutsi dio irakasleari horretan? Irakasleak ere ez daude horretan trebatuta.

Ostiralean, Bartzelonako Sadako eskola ezagutzeko aukera izan nuen. Bertako zuzendariak eskolaren funtzionamendua azaldu zigun eta gero, DBH2ko bi ikasle etorri zitzaizkigun eskola erakustera. Ikasle horiek zuten komunikatzeko gaitasunarekin erabat harritu ginen. Helduak ziruditen! Ikasleak eskolan nola lan egiten duten kontatu ziguten. Oso kontziente dira ikas prozesuaren inguruan, oso barneratuta dute eta parte dira, bai hezkuntza sisteman baita ikasketanprozesuan ere. Sadakon, gelak taldean lan egiteko egituratuta daude eta ez irakasleari begira. Aprendizai kolaboratiboari ematen diote garrantzia, hekuntza emozionala, soziala eta filosofikoari eta ikasleak komunitatean hartzen dute parte. Proiektuak eta haiek sortutako ekimenak eramaten dituzte aurrera. Ikasle bakoitzak rol bat hartzen du eta bakoitzaren ebaluazioan eta koebaluazioan hartzen dute parte.

Askotan gela batean bi irakasle daude. Bi gelek batera lan egiten dute. Ikasle asko dira baina taldeka lanean ari direnez, ez du horrek axola. Ikasgaiak ez dira existitzen. Konpetentzia transbertsalak lantzen dituzte. Proiektu batean, mineralen inguruan lan egin dezakete, ordenagailua erabiliz informazioa bildu eta ondoren, testua idazterakoan konpetentzia linguistikoa erabili edo konpetentzia artistikoa erabiliz aurkez dezakete helburuen arabera. Eskolako txoko guztietan ikus zitezkeen ikasleak taldeka haien kasara lanean. Irakaslearen beharrik gabe. Harrigarria benetan!

Oraindik zer ikasi badugula konturatu nintzen. Adibideetatik ikas dezakegu gurera moldatuz. Bada garaia gure eskoletara praktika onak ekartzeko eta ikasleak ikaste prozesuaren kontzientzia har dezaten lan egiteko.

Entzun
Ainhoa Bilbao: “Gero eta jende gehiagok jotzen du bidezko merkataritzara, ohikoaren alternatiba gisa”

Ainhoa Bilbao: “Gero eta jende gehiagok jotzen du bidezko merkataritzara, ohikoaren alternatiba gisa”

Gasteizko 14 saltokik bat egin dute Bidezko Merkataritzaren ibilbidearekin: ‘Zeroz biderkatu’ kanpainaren bitartez, bidezko merkataritzako produktuak dituzten establezimenduak agerian jarriko dira, eta hiru saski zozkatuko dira horrelako produktuak kontsumitzeagatik, bi lokalen zigilua lortzen dutenen artean. Bide bidean, Setem, Oxfam eta Medicus Mundi erakundeek osatzen dute Gasteizko Bidezko Merkataritzaren Partzuergoa, eta pozik agertu dira, gero eta jende gehiagok ezagutzen duelako bidezko merkataritza.

Entzun
“Azpiegitura erraldoiak” -Maider Martinez-

“Azpiegitura erraldoiak” -Maider Martinez-

Azken urteetan gure inguruan azpiegitura erraldoiak nola egiten ari diren ikusi dugu, eta oraindik diru gutxiago dagoenean ere, dirua proiektu handietara zuzentzen jarraitzen dute.

Abiadura handiko trenak ikaragarrizko dirutza behar du, eta ez bakarrik eraikitzen duten bitartean, baita ere bere mantenimenduan. Inbertsio honen onuradun bakarrak eraikitzen ari diren enpresak izango dira. Herrialdearen barrena bidaiatzeko ez du balio, eta ikaragarrizko kaltea eragiten ari dira gure lurraldean.

Errepideetan ere, inbertsioak gune jakinetan ematen dira, bertan beharrezkoak diren baino azpiegitura handiagoak eginez eta beste leku batzuetan beharrezkoak diren konponketa txikiak bazterrean geldituz. Horiek, kanpoko enpresa handientzat ematen dute lana, bertako txikiak alde batera utziz.

Ureztatzeko baltsa ikaragarri baten proiektua ere badago Arabako lurraldean, Barronen hain zuzen ere. Baltsa hau egiteak ere ur hori banatzeko azpiegitura ikaragarria exigitzen du, eta nekazarientzat oso garestia izango da ur hori, betidanik errentagarriak eta egokiak izan diren gertuko balsa txikiak alde batera utziz.

Arabako iturriko ur hornidura gehiena Amvisan zentralizatzeko helburuak ere badu lotura Arabako Aldundiak zerbitzua optimizatzeko aitzakiarekin. Gaur egun herriek beraien ura kudeatzen dute ia kasu guztietan herritarren auzolanaren bitartez, zer da hau baino egokiagoa? Amvisa, gero eta handiagoa den enpresa, esku pribatuetan bukatzeko arrisku handia duen enpresa, gure iturriko ura negozioa bihurtuz.

Inbertsio handi hauek bazter batean uzteko garaia da, inbersio txikiagoak, bertako jendearentzat onuragarriak izango direnak, bertako empresa txikiak egingo dituzten inbersioak, bertan lanpostuak sortuz eta aberastasuna ere bai.

Zenbaten bizitza hobetzen dute inbertsio ikaragarri horiek eta diru horrekin zenbat inbertsio txiki egin daitezke jendearen bizitza hobetzeko?

Konturatu gara ze enpresa diren inbersio horiek egiten dituztenak? ACS, FERROVIAL, ABENGOA, ACCIONA…eta pareko beste batzuk, hauetatik bat ere ez da bertakoa. Hau da aberastasuna Euskal Herriarentzat?

Azpiegitura tamalgarri hauek sortzen duten aberastasun bakarra gutxi batzuen eskuetan gelditzen da. Bada garaia baliabideak jendearen onurako zuzentzeko.

Entzun
Mikel Otero: “Mendebaldeko demokraziei berdin zaie Saudi Arabia munduko diktadurarik bortitzena izatea, petrolio-esportatzaile handiena baita”

Mikel Otero: “Mendebaldeko demokraziei berdin zaie Saudi Arabia munduko diktadurarik bortitzena izatea, petrolio-esportatzaile handiena baita”

Gaur eztabaidatu dute Eusko Legebiltzarrean Bilboko portutik Saudi Arabiara garraiatzen diren armen auzia. Hori dela-eta, “SOS Yemen” lelopean, elkarretaratzea egin dute Ongi etorri errefuxiatuak Araba plataformak eta Iruñea harrera-hiria kolektiboak, Saudi Arabiara eramaten diren arma horiek Yemengo gerran erabiltzen direla eta, beraz, hildakoak eragiten dituztela salatu dute han bildutakoek. Mikel Otero EH Bilduko parlamentariak hilabeteak daramatza gai hori lantzen, eta berarekin hitz egin dugu EAEko erakundeek garraio horretan duten arduraz eta euskal enpresetan ekoizten diren armei buruz. Bilboko portuan egiten ari diren harresiaz ere mintzatu da Otero, paradoxikoa baita gerra horiek eragiten dituzten iheslariei oztopoak jartzea eta gerra horietarako armak garraiatzea, aldi berean.

Entzun
“Zoroen gauzak” -Mikel Ayllon-

“Zoroen gauzak” -Mikel Ayllon-

Urtero gertatzen zait gauza bera. Urtean behin bai, gutxienez. Armairutik arropa aukeratu, kalera ateratzeko jantzi, logelako atera hurbildu… eta belaunak dardaraka hasten zaizkit. Ez dakit beti izaten den garai bertsuan, urte-sasoi antzekoan. Ez dakit beti izaten den goizez ala arratsaldez. Edo gauez. Kalera ateratzeko prestatu eta indarrek eskapo egitea. Eta gogoak.

Labritek alde egin zuenetik gure etxea kanposantuak baino isilago dago. Telmo batetik bestera pasiatzen da hobitik ateratako hildako berpiztu bat balitz bezala, edo emazteari loreak ekartzera etorri den gizon zimur eta mutu bat. Ia ez diogu ezer esaten elkarri. Nork bere buruari bai, baina hori, beti isilean.

Ez dakit zergatik gertatzen zaidan. Ez dakit urtaroak zerikusirik daukan, edo asteko egunak, edo egunaren orduak, edo hotzak, edo beroak. Logelako ateko heldulekuari eragin eta hortxe ahitzen zaizkit indarrak, hortxe hasten belaunetako dardarak.

Lehen, sikiera, lagunak etortzen ziren noizean behin bisita egitera etxera. Afari-legea egiten genuen tarteka, eta hitz-aspertuan entretenitzen ginen, ia goiz-albak harrapatzen gintuen arte, zein baino zein aho-loreago. Ama ere etortzen zen tarteka, beti begi kezkatu horiekin, eta arrandegiko filosofiaz, fruta-dendako etikaz eta ile-apaindegiko moralaz hitz eta pitz aritzen zitzaidan. Baina aspaldi da ez dudala inor ikusten, ez bada Telmo mamu hori, pasilloan agurtu ere egiten ez didana.

Labriten gutunak ere udazkenak eraman ditu, zuhaitzetako beste hosto bat gehiago balira bezala, eta postontzia hutsik eta hotzak esnatzen da goizero.

Batzuetan, urtean behin bai behintzat, logelatik ateratzeko indarrak biltzeko ere ez naiz izaten kapaz. Iruditu egiten zait, bat-batean, munduak itxura estrainioa hartzen duela, nire logelak logela itxura izateari uzten diola, zoroetxeetako gela aseptiko horietako baten itxura hartzeko, horma barrubigunekin eta metalezko altzariekin. Eta une batez nire buruari galdetzen diot ea ez ote naizen benetan burutik jota egongo, ea ez ote nagoen benetan eroetxe baten barruan. Hain da erreala begiek erakusten didatena! Baina, ez, gauza jakina baita zoroak besteak direla, beti besteak.

Ez al zaizue zuei halakorik inoiz gertatzen?

Halakoetan, nik mesanotxean gordeta ditudan pilulak irensten ditut. Hala aholkatu zidan behinola norbaitek, nahiz ez dudan akorduan nork. Bi gorri eta urdin bat. Berehala lasaitzen zaizkit belaunak, berehala uzten dio munduak gauza lauso eta estrainio hori izateari. Eta korridorera ateratzeko adorea berreskuratzen dut, eta hormak lagunen argazki alaiz beteta ikusten ditut berriro, eta iruditzen zait Telmok irribarre erdi bat eskaintzen didala pasieran, eta… entzun al duzue hori? Norbait ari da ateko txirrina jotzen.

Akaso, Labrit izango da, etxera itzultzen, dena egon dadin berriro bere lekuan, beti egon den moduan. Aterantz noala, egongelako leihoa ireki dut eta aire fin bat sartu da. Ez al duzue zuek usaintzen? Normaltasunaren usaina da.

Batzuetan, urtean behin-edo, begiekin begiratzea ahazten zait, eta mundu beldurgarri eta ilun bat egin dugula ikusten dut. Eskerrak gutxitan gertatzen zaidan eta azkar pasatzen den, horiek zoroen gauzak besterik ez baitira.

Entzun
Kike Amonarrizen hitzaldia Oihanederren, Arabako euskaldunak aktibatzeko

Kike Amonarrizen hitzaldia Oihanederren, Arabako euskaldunak aktibatzeko

“Arabako euskaldunak aktibatzeko 365 arrazoi” hitzaldiaren bitartez, “11 egun euskaraz” ekimenaren berri emango du azaroaren 23an Kike Amonarriz umoregile eta telebista aurkezleak: 2018ko Euskararen Egunaren aurreko 11 egunetan, euskara hutsez bizitzeko deia egingo diete euskaraz hitz egiteko gai direnei eta euskara ulertzeko gai direnei, modu horretan bi hiztun komunitateen artean dagoen muga ikusezina ezabatzeko. Hitzaldian, gainera, ekimena lantzen hasi diren Mendialdeko eta Zuiako dinamizatzaileekin hitz egingo du Amonarrizek, euren esperientziaren berri eman dezaten.

Manuel Moreno Topaguneko kidearekin hitz egin dugu hilaren 23ko hitzaldiaz eta 2018rako aurreikusitako ekimenaz.

Entzun

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies