Urriaren 1ean elkarretaratzea egingo dute Gasteizen Herrialde Katalanei elkartasuna adierazteko
Kataluniako autodeterminazio erreferendumak bi urte beteko ditu bihar. Sortuk eta CDR-Gasteizek elkarretaratzea deitu dute Andra Mari Zuriaren plazan "Autodeterminazioa ez da delitua!" lemapean
Gasteizen egindako beste elkarretaratze bat
Bihar bi urte beteko dira Kataluniako erreferenduma ospatu zenetik. CDRko kideen espetxeratzeak eta buruzagi katalanen aurkako berehalako Auzitegi Gorenaren sententziak markatuko dute urtemuga. Testuinguru honetan Sortuk elkarretaratzeak deitu ditu Hego Euskal Herriko hiriburuetan “Autodeterminazioa ez da delitua! Euskal Herria Kataluniarekin bat” lemapean. Gasteizen Andra Mari Zuriaren plazan jarri dute hitzordua, arratsaldeko 19:30etan. CDR-Gasteizek bat egin du deialdiarekin .
Katalunia begipuntuan
Bi urte igaro dira 2017ko urriaren 1ean bi milioi herritarrek baino gehiagok Kataluniako autodeterminazio erreferendumean parte hartu zutenetik. Polizia gogor oldartu zen egun hartan. Estatuak ere irmoki erantzun zuen Kataluniaren aurka, 155. artikulua aplikatuta Gobernu Autonomikoa indargabetu eta hainbat buruzagi subiranista kartzelaratu zituen, beste batzuek erbestera ihes egin behar izan zuten, Gasteizen izan zen Anna Gabriel kasu.
Duela hilabte gutxi bukatu da buruzagi subiranisten aurkako epaiketa, eta epaia hurrengo asteetan egin daiteke publiko. Horren esperoan, Estatuaren indarkeriak ez du etenik Katalunian. Astelehenean Guardia zibilaren operazio erraldoi batean bederatzi herritar atxilotu zituzten eta epaileak zazpi behin-behinean espetxeratu zituen “talde terrorista” bateko kide izatea leporatuta.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
