Santo Domingo kalea bizirik dagoela aldarrikatuko dute larunbatean manifestazio batekin
13:00etan abiatuko da manifestazioa, 40 eta 42 blokeetatik. Instituzioen eta, zehatzago, Udalaren utzikeria salatuko dute mobilizazioarekin.
Argazkia: Goian
Aurreko astean, Gasteizko Alde Zaharreko eragile ezberdinek Santo Domingo Bizirik! kanpaina jarri zuten martxan. Helburua, bikoitza zen: instituzioen utzikeria salatu eta elkarbizitzarako deia egin. Eragile horien artean zeuden Gasteiz Txiki Auzo Elkartea, Goian, Gasteizko Gaztetxea, Hala Bedi…
Kanpaina aurkeztearekin batera, larunbatean, azaroaren 11n, elkarretaratzea zaratatsua egin zuten kalean bertan. Auzoko norbanako eta eragile ugari batu ziren elkarretaratzera, tartean, Gasteizko Okupazio Mugimenduko kide ezberdinak. Izan ere, aurreko astean, Gasteizko Okupazio Mugimenduak etxebizitzak eskaini dizkiei Santo Domingo kaletik kanporatu dituzten bizilagunei.
Baina elkarretaratzeak elkarretaratze eta keinuak keinu, arazoak bere horretan jarraitzen du. Udalaren eta gainontzeko instituzioen utzikeria, CaixaBanken jarrera, obren gastu altua, Santa Maria Fundazioaren plana… ezkutuko desjabetze baten beldur dira Santo Domingo kaleko bizilagunak.
Hori gutxi balitz, bizilagunek Udaltzaingoaren jarrera salatu zuten. Norbaitek blokea okupatuko zuelako beldur ziren Santo Domingon; hori dela eta, giltzarrapo batzuk jarri zituzten ateetan. Giltzarrapo horiek poliziei eman behar izan zizkieten euren etxeak uzterakoan. Santo Domingo Bizirik! kanpainatik, argi dute Udaltzaingoaren presentzia gehiegizkoa dela eta “beldur” sentsazioa sortzen dutela, “kale arriskutsuaren” irudia ematearekin batera.
Hau guztia salatzeko eta kalea bizirik dagoela aldarrikatzeko, manifestazioa egingo dute azaroaren 18an, larunbatean, Santo Domingoko 40 eta 42 blokeetatik abiatuta -hustu dituzten azken blokeak-. 13:00etan abiatuko da manifestazioa “Udalaren utzikeriarekin aurka, Santo Domingo Bizirik!” lemapean.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
