Mozal Legea ezarri dio Eusko Jaurlaritzak Hala Bediri
Maiatzaren 18an Errekaleorreko argi mozketan egindako lanaren aurkako erasoa da isun hau. Isuna desobedituko du Hala Bedik, lege injustuak desobeditzeko dugun legitimitatea mahai gainean jarriz. Ertzaintzak kazetari bat Mozal Legearekin zigortzen duen lehenengo kasua da hau.
Mozal Legea ezarri diote Hala Bediri. Arrazoia, sinplea: Errekaleorreko argi mozketaren jarraipena egitea, gainontzeko hedabideek aukerarik izan ez zuten lekutik Iberdrolaren eta Ertzaintzaren jardueraren berri ematea.
Izan ere, Eusko Jaurlaritzak zeuzkan asmoen jakitun, erresistentziarako prest zeuden goizean goizetik Errekaleorreko bizilagunak. Hala Bediko kide pare bat ere bertan zeuden ordurako, han gertatzen ari zenaren berri emateko.
Beranduago hurbildu ziren komunikabideek, ordea, ez zuten han gertatzen ari zenaren inguruko informaziorik behar bezala emateko aukerarik izan, ertzainek auzora sartzea eragotzi baitzieten. Hori dela eta, han zeuden komunikabide gehienek, kordoi polizialaren bestaldetik ikusi eta kontatu behar izan zuten bertan gertatzen ari zen guztia. Hala Bedi izan zen, beraz, gertatzen ari zena barrutik kontatu ahal izan zuen medio bakarra.
Hala Bedi izan zen gertatzen ari zena barrutik kontatu ahal izan zuen medio bakarra.
Hala ere, Mozal Legea ez ezik, bestelako erasoak ere jasan behar izan zituen Hala Bedik egun hartan Errekaleorren. Salatu genuen moduan, ertzainetako bat Hala Bediko kideengana hurbildu eta haien kontra kolpeka eta bultzakaka hasi zen sakelekoarekin grabatzen ari zirelako. Kolpe eta bultzakada horien ondorioz, Hala Bediko kazetariari sakelekoa apurtu zioten. Kazetariak orduan, prentsa txartela erakutsi eta identifikatzeko eskatu zion poliziari. Honek, inongo azalpenik eman gabe, prentsa txartela eskuetatik kendu eta nortasun agiria eskatu zion Hala Bediko kideari. Azkenik, eta ahalegin askoren ondoren, txartelak itzuli eta ertzainak bere plaka zenbakia jakinarazi zion kazetariari, tonu mehatxagarrian honako hau gehituz: “Sabemos quiénes sois, sabemos que sois del entorno radical”.
Adierazpen horien ostean, publikoki salatu genuen erasoa. Orain, haratago joan dira eta Mozal legea ezarri digute. Tristeak dira, oso, erabili behar izan dituzten argudio faltsuak. Izan ere, isunean justifikatu nahi dutenez, zigorra ez da gure lana egiteagatik. Zigorra, ertzaintzaren esanetan, kordoi poliziala apurtzeagatik, ertzainen aurka egiteagatik … Gezurra, ez dute frogarik gainera. Guk geneukan froga, aldiz, apurtu ziguten mugikorrarekin grabatutakoa zen. Zoritxarrez, ezin izan ditugu artxiboak berreskuratu.
2016ko ekainaren 22an, Eusko Jaurlaritzak “Mozal Legea ez aplikatzeko konpromezua” hartu zuen. Ordutik, ordea, isunak, prozesu judizialak eta kazetariok gure lana egiteko dugun eskubidearen aurkako erasoak, azken hau, Hala Bediri. Ertzaintzak kazetari bat Mozal Legearekin zigortzen duen lehenengo kasua da hau.
Ertzaintzak kazetari bat Mozal Legearekin zigortzen duen lehenengo kasua da hau.
Desobeditzeko legitimitatea
Hala Bediko asanbladak hala onartuta, ez dugu isuna ordainduko. Lege injustu bat den heinean, hau desobeditzeko legitimitatea daukagula uste dugu. Gauzak horrela, ez dugu isuna ordainduko eta epe ertainean prozesu juridiko bat abiatzeko asmoa dugula iragarri nahi dugu.
Herritar guztiok dugu lege injustuak desobeditzeko legitimitatea. Mozal legea, lege horietako bat den heinean, herritarroi orokorrean eta kazetarioi ere erasotzen digu. Mozala jarri nahi diote gure lanari, gure informatzeko eskubideari. Baina ez, gu ez gaude prest horretarako.
Hala Bediko asanbladak hala onartuta, ez dugu isuna ordainduko
Gainera, orain dela bi hilabete esan bezala, zenbait puntu argi utzi nahi ditugu Hala Beditik:
- Herritar guztiok dugu gure inguruko gertaerei buruzko informazioa jasotzeko eskubidea. Horregatik, ez zaigu bidezkoa iruditzen Errekaleorrera hurbildu ziren kazetariei auzoan gertatzen ari zena kontatzeko aukera ukatzea.
- Hala Bedi izan zen kordoi poliziala saihestuz (polizia baino lehenago heldu ginelako) gertatzen ari zena bertatik bertara kontatzeko aukera izan zuen komunikabide bakarra. Orduko erasoa eta aplikatutako Mozal Legea, poliziaren gehiegikeriak ezkutatzeko helburuz hartutako neurri bidegabea dela uste dugu.
Arabako Herri Mugimenduaren egunerokotasunaren berri ematen jarraituko dugu, mozalik gabe.
Hala Bedi Irratia, 2017ko uztailaren 27an
Maiatzaren 18ko argi mozketa
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
¿Quieres apoyar a Hala Bedi?
En Hala Bedi construimos un proyecto comunicativo libre, comunitario y transformador. En el día a día, cientos de personas participamos en este proyecto, observando la realidad que nos afecta y tratando de transformarla junto a los movimientos populares.
Nuestros contenidos son libres porque nadie nos dicta qué podemos publicar y qué no. Y porque difundimos estos contenidos de forma libre y gratuita, con el objetivo de difundir, compartir y transformar.
Sin halabelarris, las socias y socios que apoyan económicamente a Hala Bedi, esto no sería posible. ¡Hazte halabelarri y apoya a Hala Bedi!
