Lanuzteekin jarraituko dute aste honetan zehar Laminaciones Arregui enpresan
"Enpleguaren defentsan" aurreko aste bukaeran abiatutako lanuzteei segida emango diete aste honetan zehar Laminaciones Arreguiko langileek. Plantilla murrizteko neurriak geldiarazi nahi dituzte horrela.
![](https://halabedi.eus/wp-content/uploads/2020/02/Arregui.jpeg)
Laminaciones Arreguiko langileek enpresa atarian egindako mobilizazioa
Plantilla murrizteko kaleratzeen aurrean alternatibak bilatzeko negoziazioak bukatutzat eman zituen Laminaciones Arreguiko zuzendaritzak, Arabako lantegiaren etorkizuna kinka larrian jarriz.
Eusko jaurlaritzaren, Lan Zuzendaritzaren eta Lan Delegaritzaren bitartekaritzarekin abiatu zituzten negoziazioak. Hasiera batean enpresak planteatutako kaleratzeen aurrean neurri alternatiboak bultzatzeko konpromisoa hartu bazuen ere konpromiso hori zalantzan jarri du Enpresa Batzordeak. Zuzendaritzaren azken mugimenduek langileen susmoak baieztatzen dituzte.
Beste hainbat irregulartasunen artean 52.d artikulua aplikatuz gaixo egon izanagatik beste hiru langile kaleratzeko mehatxua jaso dute. Langile ordezkarien iritziz: “Zuzendaritzak uko egin dio enpleguaren suntsitzea saihesteko formulak bilatzeko aukerari. Hortaz, edozein momentutan langileak kaleratu ditzake“.
2012. urtean izandako eszenatokira batera bidean daudela ohartarazi dute langileek. Urte hartan enpresak kaleratze kolektiboak jasotzen zituen ERE bat planteatu zuen. ERE hori baliogabetuta geratu eta lan gatazka “oso gogor” bat abiatu zen. zazpi urteren ostean enpresak kaleratzeei heldu nahi die berriro Gasteizko eta Urbinako fabriken etorkizuna bermatu gabe.
Lan uzte partzialak
Otsailaren 6an, osteguna, hasi ziren langileak “enpleguaren defentsan” lanuzte partzialak egiten. Ostegun eta ostiralean bi orduko paroak egin zituzten goizeko, arratsaldeko eta gaueko txandetan.
Gaurtik hasita aurreko astean abiatutako lanuzteei segida emango diete otsailaren 14era arte. Aste honetakoak ordu beteko paroak izango dira, 9:00etatik 10:00etara goizean, 18:30etatik 19:30etara arratsaldean eta goizaldeko 5:00etatik 6:00etara gaueko txandan.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!