Kirol Tabernan lan-jazarpen kasu bat salatu dute
Gasteizko Laneko Autodefentsa sareak borroka prozesu bat hasi du Kirol Tabernaren aurka. Jabeak ordubetez giltzapetua izan zuen langilea tabernan. Hortik egun gutxira, kaleratu egin du.
Lan jazarpen kasu larri bat Kirol Tabernan: langileak bere lan baldintzen eta eskubideen urraketei aurre egitean, nagusiak tabernan giltzapetu eta kaleratu egin du. pic.twitter.com/kj8BuqQPWl
— Kontseilu Sozialista Gasteiz (@Kontseilua_Gast) April 14, 2023
Ordutegiak egun batetik bestera bidaltzea, hitzartutakoa baino gehiago luzatzen diren lan jardunaldiak, berandu ordaintzea. Ostalaritza sektorean oso orokortuak dauden langileen eskubideen urraketak dira, eta horrelakoak ziren lan baldintzak Kirol Tabernan ere, langile baten Gasteizko Autodefentsa Sarearen bitartez salatu duenez.
Planto egitea erabaki zuen langileak martxoan, berriro ere kobratzeko eguna pasata oraindik soldata jaso gabe. Hurrengo egunean, nagusiak eginbeharren zerrenda bat eman eta giltzapetu egin zuen tabernan ordu betez, mendeku gisa.
Hortik egun batzuetara kaleratu egin zuen, faltsuak diren arrazoiak emanda, LASen arabera.
Laneko Autodefentsa Sareak adierazi du langilearen lan-baldintzengatik eta kaleratzea inprozedentea delako, nagusiak langileari dirua zor diola. Bitartekoak jarriko dituzte martxan ordaindu diezaion.
Ez da Kirol Taberna publikoki salatu duten lehen aldia. Orain urte batzuk ere nagusiak hainbat langileri egindako erasoak salatu zituzten.
LASek “lan jazarpen larri hau eta horrelakoak irmoki borrokatzeko asmoa” adierazi du.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
