Grebaren jarraipena erabatekoa ari da izaten ALESTIS-en
UGT eta CCOO sindikatuek sinatutako aurreakordioari ezezkoa eman ostean mobilizazioekin aurrera jarraitzen dute ALESTIS fabrikako langileek. Greba eguna dute gaur eta jarraipena %100ekoa ari da izaten. Ostegunean ere greba egingo dute.
Egoera estuan aurkitzen da ALESTIS enpresa. Abuztuan iragarri zuen zuzendaritzak Estatu mailako 585 langileren kaleratzea, 87 enpresak Miñanoko Parke Teknologikoan duen plantan, plantillaren %46. Mobilizazioetan murgilduta daude ordutik bertako langileak.
Iragan astean CCOO eta UGT sindikatuek zuzendaritzarekin sinatutako aurreakordioa ukatu zuen plantillaren gehiengoak (105 bozka kontra, 16 alde eta 3 abstentzio). Gauzak horrela mobilizazio egutegiari heldu diote berriz.
Greba eguna izaten ari da gaur Miñanoko fabrikan eta jarraipena erabatekoa ari da izaten. Ostegunerako, urriak 29, bigarren greba egun bat deitu dute sindikatuek.
Enpresako zuzendaritzak aeronautika sektoreak bizi dituen galerak erabili nahi izan ditu kaleratzeak eta Enplegu Erregulazio Espedientea justifikatzeko. Sindikatuek, kontrara, egoera «koiunturala, eta ez estrukturala» dela defendatu dute eta produkzioak aurrera egin dezakeela defendatu dute: «langilerik atzean utzi gabe».
Administrazio publikoei inplikazioa eskatu diete ere. Langileek aeronautika «sektore estrategiko» bat dela gogorarazi dute: «ezin dute lanpostuak suntsitzea onartu»
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
