ELA, LAB, ESK, Steilas, Etxalde, Hiru, CGT eta CNT sindikatuek deituta mobilizazioak egin dituzte Hego Euskal Herrian gaur goizean, bizitza duinen alde eta lan eta pentsio erreformen aurka. Gasteizen, Agurainen, Laudion eta Oionen ehunka lagun atera dira kalera. Arratsaldean manifestazioak egingo dituzte hiri, herri eta auzoetan, herri mugimenduko eragileekin batera.

Sindikatuek salatu dute pentsioen erreformarako lege proiektuak erretiro aurreratuan murrizketak ezarriko dituela, ez duela bermatzen 1.080 euroko gutxieneko pentsioa, ez eta genero arrakala gainditzea ere. Gainera, dirudienez, aurreko urteetan ezarritako murrizketak ez dira indargabetuko eta pentsio sistema publikoa ez da sendotuko. Lan erreformaren nondik norakoak “are ilunagoak” direla ere azaldu dute: “ez dirudi Euskal Herrian gure lan hitzarmenak negoziatzeko eskubidea bermatuko denik, edota indargabetuko direnik aurreko erreformen funtsezko puntuak, esaterako, kaleratzeko erraztasuna”.

Hego Euskal Herriko erakundeek eredu ekonomikoaren oinarrizko zutabeak aldatzeko duten borondate falta ere jarri dute mahai gainean sindikatuek. Salatu dute osasun, hezkuntza edo zaintza sistema publikoari zein erreforma fiskalei dagozkien politikak “Confebaskek eta CENek erabakitzen dituztela”.

“Gutxi batzuen botere gosearen gainetik, pertsona guztien bizitzak, gure herriaren eta planeta beraren biziraupena erdigunean jarriko dituzten neurri politikoak aldarrikatuz, norabide aldaketa sakona eskatuz, eguerdiko mobilizazioei jarraipena emango zaie arratsaldean” berretsi dute.