Laudion hildako gizonaren heriotza salatu dute ehundaka lagunek Osasun Zentroaren aurrean
Argazkia: LAB Aiara
Aiaraldea Gaur komunikabideak jakitera eman duenez, ehunka lagun batu dira Laudioko Osasun Zentroan, ELA, LAB, CCOO eta ESK sindikatuek deituta, asteburuan gertatutako 42 urteko David Hernandez Laudioko bizilagunaren heriotza salatzeko. Urtarrilaren 12an zendu zen Laudioko anbulatorioan bertan, bihotzekoak jota. Auziak ezinegon handia eragin du, une horretan ez baitzegoen Osasun Zentroan medikurik.
Sindikatuek diote Osakidetzan azken urteetan agintariek egin dituzten murrizketen eta desmantelazio prozesuaren testuinguruan gertatu dela heriotza hau. Osasun sistema publikoaren kudeaketa horrek “herritarren bizitzak arriskuan” jartzen dituela salatu dute eta Etengabeko Arreta Guneetan mediku baten presentzia egotea derrigorrezkoa dela azpimarratu dute.
Mediku falta bereziki nabaria eta larria da Aiaraldea kokatuta dagoen OSI Barrualden, Aiaraldea Gaur-ek informatu duenez. Euskal Herriko beste hainbat eskualdetako Etengabeko Arreta Guneen itxiera ere salatu dute sindikatuek.
Zendu den gizonak lan egiten zuen JEZeko Enpresa Batzordeak eta SOS Aiaraldea plataformak “Osasun sistema publiko eta duin baten alde” lelopean manifestazioa deitu dute ostiralerako, datorren urtarrilaren 19an, 18:30ean, Herriko Plazatik hasita.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
