Gasolindegia jartzearen aurkako paseo errebindikatzailea egingo dute Iturritxun ostiralean
Adurtzakoak eta Arelegi auzo elkarteek, Adurtza Ikastolako guraso elkarteak (Ikasberri), Olarizuko Gazte Asanbladak eta Iturritxun3ez-ek deitu dute. Gasolindegia jartzeko beharrik ez dagoela defendatzen dute, eta herritarren osasuna eta segurtasuna etekin ekonomikoen gainetik daudela.
Jauregilanda kalean jarri nahi duten gasolindegiaren aurka azaroan aurkeztutako 300 bat alegazioei Udalak zer erantzungo zain jarraitzen dutela eta, ostiral honetan kalera irteteko dei egin diete herritarrei Adurtzakoak eta Arelegi auzo elkarteek, Adurtza Ikastolako guraso elkarteak (Ikasberri), Olarizuko Gazte Asanbladak eta Iturritxun3ez-ek. “Paseo errebindikatzailea” antolatu dute gasolindegia jartzearen aurkako mezua plazaratzeko.
Hiriaren hegoaldeko kolektiboek argi utzi nahi izan dute ez dutela nahi auzotarren eta pertsonarik ahulenen osasuna eta segurtasuna arriskuan jartzen duen beste elementu bat gehitzerik Iturritxu kalearen inguruetan. Iturritxun beste gasolindegirik jartzeko beharrik ez dagoela defendatzen dute, are gutxiago ikastetxeen ondoan eta Olarizuko parkearen sarreran.
“Ez da lehenengo aldia gure auzoak espekulazioaren jomuga direla; horregatik, auzokideok eta auzoko taldeek argi utzi nahi dugu aurrean izango gaituztela eta gure osasuna eta segurtasuna beren irabazi ekonomikoen gainetik daudela”, berretsi dute.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
