Eusko Legebiltzarreko atarira eraman dute Zaldibarreko gertakariak argitzearen aldeko mezua
Zaldibarreko gertakarien inguruko azalpenak ematera bertaratu da gaur goizean Iñigo Urkullu Eusko Legebiltzarrera. Dozenaka lagunek protesta egin dute atarian "Zaldibar argitu" lelopean.
“Zaldibar argitu” lelopean Eusko Legebiltzarraren aurrean elkartu dira dozenaka lagun
Agerraldia egin dute gaur goizean Iñigo Urkullu lehendakariak eta Iñaki Arriola Ingurumen Sailburuak Eusko Legebiltzarreko Diputazio Iraunkorrean. Zaldibarreko zabortegian jasotakoaren inguruko azalpenak eman dituzte bertan.
Agerraldia bitartean dozenaka lagunek protesta egin dute Eusko Legebiltzarreko atarian. Maskarak ahoan jarrita, Zaldibarren gertatutakoa argitzea eskatu dute.
Oasia astindu duen hondamendia
Iragan otsailaren 6an amildu zen Verter Recycling 2002 SL enpresak kudeatzen zuen zabortegia. Luiziak milioi erdi tona hondakin desplazatu zituen AP-8 errepideraino. Bi behargin desagertuta jarraitzen dute, ordutik, hondakin pilaren azpian.
Desagertutako langileen bilaketa lanak abiatu eta ordu batzuetara amiantoa aurkitu zuten larrialdi zerbitzuek zabortegiko hondakinetan. Enpresak amiantodun 4.239 tona material metatu izan ditu urteetan zehar Zaldibarreko zabortegian.
Azken asteetan alarmak ez dio jotzeari utzi. Asteburuan jaso zuten azken kolpea zabortegiaren inguruko herriek: Neurketek dioxina eta furano maila altuak adierazi zituzten airean. Ondorioz, kaltetutako herrietan kalean jarduerarik ez egiteko eta etxeak ez aireztatzeko gomendioa luzatu zuten Osakidetzatik. Zabortegian suteak pizturik diraute oraindik.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
