Etxebizitza jardunaldiak egingo dituzte Zuiako Gaztetxean maiatzaren 6 eta 7an
Zuiako Gazte Asanbladako kideek antolatu dituzte jardunaldiak. Hitzaldiak, mahainguru eta eztabaida saioen bidez etxebizitzaren problematikari heldu eta esperientziak partekatzea dute helburu, eta bazkaria eta kontzertuak ere izango dira larunbatean.
Zuiako Gazte Asanbladako kideek sakon landu dute etxebizitza problematika orain arte: asanbladaren lan ildoetako bat izan da, “herriko gazteon problematika esanguratsu bat delako”. Hortaz, egindako lanari jarraipena emateko, asanbladako belaunaldi berriak “zegoenari heldu” eta hausnarketa egiten jarraitu du, gaur egungo errealitatean kokatzen saiatuz. Urte hasieran inkesta bat abiatu zuten herriko gazteen egoera hobeto ezagutzeko, eta datu horiek “zer aztertu” ematen dietela azaldu dute asanbladako kideek.
Testuinguru horretan, ikasturtea jardunaldi batzuekin bukatu nahi izan dute, horrela “arazoa herrian sozializatzeko, egiturazkoa dela plazaratzeko, herriko problematika definitzen joateko eta honen aurrean nola kokatu pentsatzeko eta erantzunetan ideia berriak jasotzeko”. Zuiako Gaztetxean bertan egingo dira jardunaldiak, maiatzaren 6 eta 7an.
Jardunaldien egitaraua
Jardunaldiak irekitzeko, AZET eta Gasteizko Etxebizitza Sindikatua gonbidatu dituzte, hitzaldi banatan gaia kokatu dezaten. Lehena ostiral arratsaldean izango da, AZET Etxebizitza Sindikatuaren eskutik eta “Etxebizitzaren problematika kapitalismoan: jabetza pribatua eta klase borroka” izenburupean. Bigarrena larunbat goizean, “Etxebizitzaren aldeko mugimenduak eta tesi gaurkotuak”, Gasteizko Etxebizitza Sindikatuak emango du.
Ondoren, Zuiako egoera izango dute hizpide. Gazte asanblada Zuiako ezaugarriei buruz arituko da, kide ohiek aurretik egin izan diren lanketak kontatuko dituzte eta bertaratuen arteko iritzi elkartrukea bilatuko. Arratsaldean “errealitate zein esperientzia ezberdinak dituzten eragileetatik ideiak hartzeko” mahaingurua antolatu dute. Besteak beste, Baztango Gazte Asanbladak, Piriniotako gazteak eta Auzoan Bizi Gasteizko Alde Zaharreko etxebizitza sareak hartuko dute parte.
Jardunaldiei amaiera emateko konztertuak emango dituzte Erreugiñak, Z-erua&L’Kano eta Bubblin Sound System taldeek.
Ostiralean bokatak afaltzeko aukera egongo da gaztetxean eta barra irekiko dute. Bazkaria ere egongo da larunbatean. Bazkaltzeko aukera azken unerarte zabalik egongo den arren, maiatzaren 3a baino lehen izena emateko eskatu dute ahal izatera, zgaztetxea@gmail.com helbidera edo zuiakogazteasanbalda instagram kontura idatzita.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
