Altsasuko gazteekin elkartasun gunea egingo dute Gasteizen
Ekainaren 14ko manifestazioaz gain, hurrengo egunean, ekainaren 15ean, Altsasuko gazteei elkartasuna adierazteko gazteen gune bat antolatu dute Andra Mari Zuriaren plazan. Ia hamar orduz egongo dira bertan eta burrunbada, bazkaria, bizikleta martxa eta elkartasun argazkia egongo dira.
Egun bat lehenago, esan bezala, manifestazioa deitu du Ernai Gazte Antolakundeak: ostegunean, 20:00etan Andra Maria Zuriaren plazatik. Deialdia gasteiztar guztiei zabaldu diote.
Mobilizazio hauek, besteak beste, larunbatean Iruñean egongo diren manifestazio nazionalerako beroketa lanak izango dira: Nafarroako hiriburura joateko autobus tiketak ohiko lekuetan daude salgai eta Txagorritxun eta Judimendin, adibidez, gazte autobusak antolatuko dituzte baina izena eman behar da egunotan.
Aiaraldean ere eskualde mailako manifestazioa egingo dute ostegunean Laudioko Lamuza plazatik abiatuta. Horretaz gain, mural margoketa egingo dute asteazkenean. Lautadan, manifestazioa ostiralean Agurainen.
Eta Gorbeialdean, hiru leku ezberdinetatik aterako da autobusa: Izarra (14:40), Murgia (14:50) eta Gopegi (15:00).
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
