Errekaleor eta ZADen arteko senidetze asteburua prestatu dute
Jarraian Errekaleorretik ZADeko kideei bidali dieten mezua:
“Zorionik beroenak, Errekaleorreko hotzetik, zuen borrokak eman dituen fruituengatik. Eredu zaituztegu. Baina bidelagun ere bai: izan ere, zuekin egin nahiko genuke zaharra suntsitu eta jendarte berri baterako bidea eraiki. Aspalditik darabilkigu burutan, ZAD eta Errekaleorren arteko bixkitzea. Izugarri daukagu elkarbanatzeko eta keinu sinbolikotik at, benetan gorpuztu nahiko genuke aldebiko harremana. Gutako batzuk joan izan gara zuenera, zuetako batzuk gurera etorri, baina bada garaia honi merezi duen forma emateko. Auzolanak, tailerrak, hitzaldiak, kontzertuak… elkarbanatzeko une polita izango da. Zuengandik ikasi eta elkarrekin gozatzeko gogoz gaude gu. Baita, harreman eta elkarlan honen bidez, erresistentziarako eta autogestiorako dinamika oro sendotzeko”.
Urtarrilean Frantziako lehen ministro Edouard Philippek jakinarazi zuen bertan behera utzi zutela Bretainian 40 urtez Notre Damme des Landes eremuan eraiki nahi izan duten aireportua. Prentsaurreko berean esan zuen ZAD eremua gurutzatzen duten errepideak “zirkulazio librerako” prest behar dituztela, eta “legez kanpo dauden okupatzaileak joan egin behar dira udaberria baino lehen, edo kanporatuak izango dira”.
Errekaleorren prestatu duten egitaraua:
Apirilak 20, ostirala:
17:00etan ZADeko lagunei harrera.
19:00etan iluntze feminista.
Apirilak 21:
10:00etan auzolanak
17:00etan hitzaldi eta topaketak.
20:00etan triki poteoa Gasteizko gaztetxera.
Apirilak 22:
10:00etan auzolan eta topaketa gehiago.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
