Bertsolari Txapelketa Nagusiko saioetako bat jokatuko da Gasteizen igandean
Irailaren 24an hasi zen Euskal Herriko Bertsolari Txapelketa Nagusia eta bi saio jokatu dira asteburu honetan: lehena larunbatean Gotaine-Irabarnen, eta Gasteizen bigarrena, igandez.
Gasteizeko saioa, gainerako guztiak bezala, arratsaldeko 17:00etan hasiko da. Europa Jauregian jokatuko da, Arabako azken Bertsolari Txapelketaren finala egin zen leku berean. Zehazki, Maria de Maeztu entzunaretoan izango da saioa.
Oholtzara igoko dira Manex Agirre Arriolabengoa arabarra, Amaia Iturriotz Etxaniz, Haritz Mujika Lasa, Iban Urdangarin Lardizabal, Miren Artetxe Sarasola eta Xabat Galletebeitia Abaroa.
Manex Agirre da Txapelketa Nagusian lehiatzen diren bi arabarretako bat, eta Peru Abarrategi Sarrionandia bestea, 2022ko Arabako txapelduna. Abarrategik iragan larunbatean egin zuen Txapelketa Nagusiko lehen saioa, Getxon. Alaia Martin izan zen irabazlea 738 punturekin, zuzenean finalaurrekora sailkatuz horrela. Haren ondotik geratu ziren Nerea Elustondo 695rekin, Agin Laburu 685rekin, Oihana Bartra 653,5ekin, Unai Mendizabal 635ekin eta Peru Abarrategi 627rekin.
Sarrerak eskuratzeko 15:00etan irekiko da leihatila. Aretoko atea 16:00etan zabalduko da. Interneteko salmentari dagokionez, sarrerak eskuragai daude www.bertsosarrerak.eus atarian.
Gotaine-Irabarnen Ane Labaka Mayoz, Eneko Lazkoz Martinez, Julio Soto Ezkurdia, Nerea Ibarzabal Salegi, Oihana Iguaran Barandiaran eta Patxi Iriart Hiribarren dira oholtzara igoko diren sei bertsolariak. Aritz Bidegain Airek aurkeztuko du saioa.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
