Azken asteetan hainbat eraso matxista egon direla salatu eta ostiralerako manifestazioa deitu du Aiaraldeko Mugimendu Feministak
Manifestazioa deitu du Aiaraldeko Mugimendu Feministak urriaren 12an Urduñan, azken astean gertatu diren eraso matxistak gogor salatzeko helburuarekin. Laudion ez ezik Amurrion eta Urduñan ere jaso dira halako kasuak azken hilabete honetan.
Aiaraldeko Mugimendu Feministak azken asteetan eskualdean gertatu diren eraso matxisten berri eman du. Amurrio eta Urduñako neska gazte batzuek salatu dute mehatxuak, jarraipenak eta mezu iraingarriak jasan dituztela kaletik. Eraso horien atzean Urduñako mutil gazte bat dagoela adierazi dute eskualdeko talde feministek. Egunez zein gauez neska gazteak jarraitu eta haien aurrean masturbatu egin da erasotzailea.
Aiaraldeko Mugimendu Feministak gogor arbuiatu ditu erasoak eta hauen aurrean geldi egongo ez direla adierazi dute, “ez dugu aukera bakar bat gehiago emango eta justizia gure eskuetan hartzera goaz”. “Apustu ausartak” eta “neurri sakonak” beharrezkoak direla azpimarratu dute.
Manifestazioa deitu dute ostiral honetarako. Protesta arratsaldeko 19:30ean abiatuko da Urduñako Foru Plazatik.
Halaber, eragile feministek indarkeria matxista “lehen mailako arazo politiko, sozial, ekonomiko eta kulturala” dela gogorarazi dute, “erasoak ez dira modu isolatuan ulertu behar, bizi garen jendartearen antolaketa sexista ahalbidetzen duen indarkeriaz ari baikara”.
Laudioko erasoa ere salatu dute
Asteleheko Laudion salatutako eraso matxista ere arbuiatu dute, eta salaketa jarri zuen emakumeari elkartasuna adierazi diote: “gure elkartasun eta indarrik beroenak horrelako erasoak jasan behar dituzten emakume guztiei”.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
