Urtarrilaren 9an hasi zuten Mendizabala Institutuan burutzen ari duten itxialdia. Hezkuntza Sailarekin bilera bat egin dute eta datorren astelehenean beste bilera batetara deitu dituzte irkasleak. Bitartean, itxialdian jarraituko dute.

Araba, Bizkaia eta Gipuzkoako Lanbide Heziketako hainbat irakaslek itxialdi bat hasi zuten urrtarrilaren 9an Mendizabala Institutuan. Eta, bi aste bete direnean, itxialdiarekin jarraituko dutela adierazi dute.

Irakasleek jakinarazi dutenez, 18 hilabeteko “isiltasun luze” baten ostean, urtarrilaren 11n bilera bat izan zuten Hezkuntza Saileko zuzendaritzarekin eta hiru herrialdeetan lan egiten duten irakasle teknikoek biileraren balorazio positiboa egiten dute. “Argi dugu ere, bilera hau Mendizabala institutuan burutzen ari garen itxialdiagatik deitua izan dela”.

Bilera horretan, Lanbide Heziketan lan egiten duten irakasleek “babesgabetasuna” zein den azaldu zioten administrazioari. Honen harira, pertsonaleko zuzendaritzak 15 eguneko epean gure arazoari aterabide egoki bat emateko konpromisoa hartu zuen eta bilera berri batera deitu zituen irakasleak urtarrilaren 28an Lakuan.

“Ordura arte Arabako irakasle teknikoek, Urtarrilaren 9tik aurrera Mendizabalako ikastetxean daramagun itxialdiarekin jarraituko dugu. Hezkuntza sailak gure egoerari irtenbide duina emango dion proposamena luzatzea espero dugu”. Bitartean, bertan lo egiten jarraituko dute.

Aldarrikapenen artean, bat da nagusi: Jorge Arévalo Turrillas Eusko Jaurlairtzako Lanbide Heziketako Sailburuordeari irakasle teknikoen egoera egonkortzeko pausuak eman ditzan eskatzen dute. Arrazoia, ordea, beste bat da: etorkizunean irakasle hauek ezingo dira gaur egun Araban, Bizkaian eta Gipuzkoan betetzen dituzten postuetako Lan Eskaintza Publikoetara aurkeztu.

Irakasle hauen iritziz, Lanbide Heziketak duen egoera “ona” da eta hori horrela izateko aktibo nagusienetako bat Lanbide Heziketako zentro publikoetan lan egiten duten profesionalak direla uste dute. Horretaz gain, arratsaldeetan profesional eta langabeak birziklatzen dituzten berberak direla gogoratu dute.

Salatu dutenez, sistema horren erdian daude irakasle teknikoak, perfil praktikoagoa dutenak eta beraien ekarpena egiten dutenak arlo horretan. “Irakasle horiek Lanbide Heziketako zentroetan formatu dira eta gela horietara bueltatzen dute ikasitakoa, askotan bestelako lanetan jasotako esperientzia gehituz”.

2007. urtean 276/2007 errege-dekretua argitaratu zen honako izenburu honekin: Reglamento general de ingreso, accesos y adquisición de nuevas especialidades en los cuerpos de funcionarios docentes y que básicamente y de manera arbitraria re-parametriza en su anexo VI el Cuerpo de Profesores Técnicos de Formación Profesional.

Beste modu batean esateko, errege-dekretu honek administrazioari lan eskaintza publikoak deitzen dituenean zein bide hartu behar duen esaten dio.

Hezkuntza Sailak 2018an deitutako Lan Eskaintza Publikoak 276/2007 errege-dekretua aplikatu zuen. “Esan beharra dago aplikazio hori Errege Dekretua indarrean sartu eta 11 urte beranduago eman dela”, gaitzetsi dute irakasleek. “Momentu honetatik aurrera ordezkapenak egiten ditugun irakasle teknikoak inongo babesik gabe geratu gara”. Hemendik aurrera, irakasle hauek ezingo dira gaur egun Araban, Bizkaian eta Gipuzkoan betetzen dituzten postuen eskaintza publikoetara aurkeztu.

“Kasurik onenean ordezkapenak egitera kondenatuta gaude… Edo hezkuntza sistematik kanpo utzi”

Irakasleak, bitartean, paradoxa baten aurrean daude: “Lan Eskaintza Publikora aurkezten diren irakasleen ordezkapenak egiteko, gure konpetentziak kontutan hartzen dira. Lan Eskaintza Publiko horretan parte hartzeko, ordea, ez”. Hori gutxi balitz, gogoratu dutenez, azken 11 urte hauetan ordezkapenak egiteko zerrendak hainbat alditan zabaldu dira, Lanbide Heziketa ikasi duten pertsonei bertan sartzeko aukera eskainiz.

Momentu honetan, Eusko Jaurlaritzaren Hezkuntza Sailak Lan Eskaintza Publiko sistema bidez finkatzen ditu irakasleak eta bertan parte hartzea saritzen hasiko da. Bitartean, aipatutako irakasleek ezingo dute bertan parte hartu.

“Honen aurrean irakasle teknikoak babesgabe gaude. Gure egoera gero eta okerragoa izango da, izan ere, urteetan lortutako puntuak ez dira nahikoa izango Lan Eskaintza Publikoa atera duten edo puntuak biltzen dituztenak atzetik pasatuko gaituzte. Gu, kasurik onenean, ordezkapenak egitera kondenatuko gaituzte edo hezkuntza sistematik kanpo geratuko gara“, ondorioztatu dute.