Gasteizko Mugimendu Feministak elkarretaratzea deitu du azken hilketa matxista salatzeko
32 urteko emakume gasteiztar bat hilik agertu zen atzo Gasteizko aparthotel batean. Ustezko hiltzailea, bikote ohia, atxilotu egin dute Zaragozan, Gasteiztik ihes egiten ari zenean.
Orioko hilketa matxista salatzeko Gasteizko Mugimendu Feministak egindako mobilizazioa.
Gaur, maiatzaren 29 astelehena, elkarretaratzea egingo du Gasteizko Mugimendu Feministak arratsaldeko 19:00retan Andra Mari Zuriaren Plazan. Hala salatuko dute atzo ezagutu zen erailketa matxista. Ertzaintzak jakinarazi zuen igandean 32 urteko emakume baten gorpua topatu zutela aparthotel batean, eta hilketa matxistaren hipotesia baieztatu zuen ordu batzuk beranduago.
Eraildako emakumea bere hiru urteko haurrarekin zegoen gelan, eta hedabide ezberdinek argitaratu dute haurdun zegoela eta bikiak espero zituela, nahiz eta Segurtasun Sailetik ez duten hau baieztatu. Hedabide ugarik jakinarazi dute duela gutxi arte Valentzian bizi zela emakumea, eta indarkeria matxista jaso izanagatik “muturreko arriskuaren” aurkako babes berezia ezarria ziotela. Astebete inguru zeraman Gasteizen bizitzen, eta zeukan babes maila apaldu egin zioten hemen, bere bizilekua sekretupekoa zela iritzita.
Hilketa matxistaren hipotesiaren atzetik, bikotekide ohiaren bila ibili zen Polizia, eta gauean atxilotu zuen Guardia Zibilak, Zaragozan. Hedabide ezberdinek azaldu dute Gasteiztik ihes eginda zegoela Zaragozan, eta taxi batean atzeman dutela gizona, AP-68 errepidean.
Bi erahilketa matxista bi astetan
Maiatzaren 16an beste hilketa matxista bat eman zen, Orion kasu honetan. Gizonezko batek 50 urteko bikotekide ohia hil zuen eskopeta batekin, eta bere buruaz beste egin zuen ondoren. Bi asteko tartean Euskal Herrian ematen den bigarren hilketa matxista da atzokoa. 2003. urtetik 118 emakumezko hil dira indarkeria matxistaren ondorioz.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
