Santiagoko Larrialdien itxieraren kontrako 12.000 sinadura aurkeztu dituzte
Osasun Publikoa Aurrera plataformak 12.000 sinadura aurkeztu ditu Osakidetzako Zerbitzu Zentraletan, Santiago ospitaleko larrialdietako zerbitzuaren eta Gasteizko San Martingo Etengabeko Arreta Gunearen itxieraren kontra. through Alea.eus
Asteazken honetan, Gotzone Sagardui Osasun sailburuari, Iñigo Urkullu lehendakariari eta Jose Maria Perez Ramos Arabako ESIko gerenteari 12.000 sinadura entregatu dizkie Osasun Publikoa Aurrera plataformak.
Urtarrilean Change.org plataforman abiatutako sinadura bilketak hiru eskakizun nagusi zituen: Santiago ospitaleko Larrialdiak ez ixtea, San Martingo EAGa (PAC) berrirekitzea eta Gasteizko osasun zerbitzuak indartzea.
Otsailaren 2an itxi zituzten Santiago ospitaleko Larrialdiak, Txagorritxuko eraikin berrira lekualdatzeko. Orduz geroztik, premiazko arreta aurrez aurre jaso nahi duten herritar guztiek bertara jo behar dute. San Martingo Etengabeko Arretako Gunea, berriz, 2019an itxi zuen Arabako ESIk; hasiera batean udarako behin-behineko itxiera iragarri zuen arrean, 2022ko martxoan itxita jarraitzen du oraindik.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
