Lau gazte deklaratzera deitu eta horietako hiru atxilotu ditu Espainiako Polizia Nazionalak Gasteizen, urtarrilaren 30eko Greba Orokorraren harira
Espainiako Polizia Nazionala lau gazteen etxean agertu zen eta soilik bi atxilotzea lortu zuen. Asteazken goizean hirugarren bat atxilotu dute. 19:30ean manifestazioa egingo dute Gasteizen atxiloketok errefusatzeko.
Espainiako Polizia Nazionalak azaroaren 10eko asteartetik albiste hau idatzi den unera arte, hiru gazte gasteiztar atxilotu ditu aurreko urtarrilaren 30eko Greba Orokorrarekin lotuta. Mobilizazioetan egondako ustezko istiluekin erlazionatuta omen daude atxiloketa hauek.
Asteartean, kalez jantzitako poliziak lau gazte gastiztarren etxeetan agertu ziren Betoñoko komisaldegian deklaratzeko aginduarekin. Horietatik bi kotxeetan sartu eta deklaratzera eraman zituzten, beste biekin, aldiz, ez zuten lortu. Atxilotu ez zuten horietako bat, asteazkenean atxilotu dute. Ordu hauetan, atxilotutako hiru gazteak aske dira jada. Hala ere, zenbait iturrik Hala Bedi-ri adierazi diotenez, oraindik ere atxiloketa gehiago eman daitezke.
Hala Bedi-k jakin duenez, gazteei ez zitzaien jakinarazpen ofizialik eman deklaratzera joateko, soilik hitzez eman zieten deklarazioaren berri.
“Euskal gazteriaren aurka ematen ari diren erasoen aurrean” kaleak hartzeko deia zabaldu dute iturriok eta asteazkenean bertan, 19:30ean mobilizazioa deitu dute Andra Maria Zuriaren enparantzatik abiatuta.
Duintasunaren defentsan egindako Greba Orokorra
Lan, pentsio eta bizitza duinen defentsan Greba Orokorra deitu zuen urtarrilaren 30erako Euskal Herriko Eskubide Sozialen Kartak.
Azken urteetako borroka sozialen bultzadaz Arabako kaleak hartu zituzten milaka eta milaka grebalarik. Goizeko piketeek lantokietako jarduna eten zuten eta eguerdian 25.000 lagun atera ziren Gasteizko kaleetara. Arratsaldean mobilizazioek aurrera egin zuten Araba osoan zehar.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
