Korrika sinboliko batekin ospatuko dute Euskararen Nazioarteko Eguna Judimendin
Judimendi auzoko hainbat eragile elkartu egin dira abenduaren 3aren testuinguruan egitarau txiki bat antolatzeko.
Modu berezian ospatuko dute Euskararen Nazioarteko Eguna Gasteizko Judimendi auzoan. Pandemia egoerak urtebetz atzeratu du 2021eko udaberrian ospatu behar zen Korrikaren 22. edizioa. Horregatik, nazio mailako ekimenari keinu txiki bat egin nahian, Judimendiko Gazte Asanblada, Sumendi, auzoko aisialdi taldeak, Kale Hezitzaileak, Auzo Elkartea eta auzoko AEK elkarlanean aritu dira Korrika sinboliko bat antolatzeko.
Arratsaldeko 18:00etan Sefarad Plazatik abiatuko da Korrika; aurretik, arratsaldeko 17:00etan, peto-tailer bat egingo dute Gizarte Etxean.
Antolatzaileek parte-hartzaileen artean uneoro 1,5 metroko distantzia mantenduko dela azaldu dute, gainera maskara erabiltzea derrigorrezkoa izango da.
Egitarauarekin jarraitzeko, abenduaren 4ean magia ikuskizun bat antolatu dute Aranako Gizarte Etxean, arratsaldeko 18:00etan.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
