Iritzia | “Etor dadila inkisizioa gure bila” -Gasteizko Mugimendu Feminista-
Ez itzuli bakarrik etxera. Ez ibili gune ilunetatik. Ez jantzi gona motzik. Ez gurutzatu industrialdetik, ez bakarrik, ez taldean, gauean batez ere. Ez hitz egin ezezagunekin. Ez egin auto-stopik. Ez probokatu. Ez egin egin dantza lizunik. Ausarta izan, ez zaude bakarrik.
Zer izan, zer egin, zer esan, nola jantzi, norekin egon…esaten digute behin eta berriz gure segurtasuna bermatzeko asmoz. Guk, ordea, argi daukagu gure erabakia dela zer izan, zer egin, zer esan, nola jantzi edo norekin erantzi. Guk eraiki nahi ditugu gure bizitza eta harreman ereduak; sistema heteropatriarkal kapitalistak inposatzen dizkigun baloreak deseraikiz.
Bizikidetza aitzakitzat erabiliz, gure bizitza arriskuan jartzen duten ekintzak aurrera eramaten dituzten horiek dira erasotzaileak. Zer izan, zer egin, nola jantzi edota norekin egon librea den horretan; bizikidetza, elkartasuna eta laguntasuna nagusi den horretan, eraso egin diguzue. Gure bizi eredua zalantzan jarriz, eraso egin diguzue; gure segurtasunari eraso egin diozue, gure askatasunari eraso egin diozue. Bizitza erdigunean jartzen duen eta eredu hegemonikoetatik at sortzen den edozein proiektu erradikatu nahi duzue, baina guk argi daukagu hau ez dela guk nahi dugun bizi eredua. Guk gurean jarraituko dugu, maite dugun hori defendatzen eta bizitza erdigunean jartzen.
Gure segurtasunaren izenean aho betez hitz egiten duzuen horiei, jakinarazi nahi dizuegu ez garela kikilduko. Sistema elektrikoa ez omen da segurua, baina segurtasunaren izenean ehundaka pertsona argi gabe uztea, gune ilun bat sortzea, pertsonak etxebizitzarik gabe eta egoera prekarioan uztea, bai.
“Gomendioak” emateaz gain ez duzue ezer egiten, ez erasoak ekiditeko ezta herria bizirik mantentzeko. Ez duzue inoiz gaia errotik lantzen, ez duzue indarkeria sistemaren baitan ulertzen, eta herri mugimendua kriminalizatzen diharduzue egunero, herriaren “segurtasunaren” izenean. Adibide bezala, Errekaleor auzoan eman den azken erasoa.
Guk etxera bakarrik bueltatu nahi dugu, ez ditugu gizarte heteropatriarkalak guretzako dituen “gomendioak” jarraitu nahi, libre izan nahi dugu, sorgin eta libre, eta ahalik eta altuen hegan egin.
Oraingoan ez dizuegu sorgin ehiza hau burutzen utziko, hegan egiten ikasi baitugu. Inoiz baino biziago dagoen Gasteiz honetan, okupazioz, autogestioz, alternatibaz, feminismoz… beteta dagoen hiri honetan, zuen mehatxuek ez dute kabidarik. Bizitza erdigunean jartzea delitua bada, etor dadila inkisizioa gure bila, suaren inguruan dantzan harrapatuko gaitu.
Gasteizko Mugimendu feminista
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
¿Quieres apoyar a Hala Bedi?
En Hala Bedi construimos un proyecto comunicativo libre, comunitario y transformador. En el día a día, cientos de personas participamos en este proyecto, observando la realidad que nos afecta y tratando de transformarla junto a los movimientos populares.
Nuestros contenidos son libres porque nadie nos dicta qué podemos publicar y qué no. Y porque difundimos estos contenidos de forma libre y gratuita, con el objetivo de difundir, compartir y transformar.
Sin halabelarris, las socias y socios que apoyan económicamente a Hala Bedi, esto no sería posible. ¡Hazte halabelarri y apoya a Hala Bedi!
