Presoak gogoan, haiek kaleratzeko aldarria Gasteizen egindako mobilizazioan
Sarek antolatuta, ehunka lagun elkartu da Gasteizen presoen etxeratzea lehenbailehen gerta dadin aldarrikatzeko. Ekimen herritarraren dinamikan kokatutako mobilizazioa izan da, urtarrilaren 13an Bilbon izango den manifestazio nazionala hitzordu nagusia duena. through Naiz.info
Ehunka lagun elkartu dira gaur arratsaldean Gasteizen izandako mobilizazioan. Sarek antolatuta, manifestazioa egin dute hiriko erdialdeko kaleetan barrena.
Manifestazioaren buruan, txistulariak, baserritarrez jantzitako lagunak eta presoen senideak, haien sinbolo den kinkearekin, joan dira. Segidan, bandera handi bat eta pankarta bat, bietan eskaera berarekin: «Etxera».
Sareren dinamikaren baitan hitzordu berri bat izan da Gasteizkoa, atzo Martuteneko espetxetik manifestazioa egin ostean. Hurrengo hitzordua Iruñean dute, abenduren 29an. Kontzentrazio deszentralizatuak egingo dituzte Nafarroako hiriburuan. Hurrengo egunean, abenduaren 30ean, Basauriko espetxetik irtengo da manifestazio bat. Hitzordu nagusia urtarrilaren 13an izango da Bilbon. La Casillatik abiatuko da manifestazio nazionala.
Sarek jakinarazi duenez, ‘Konponbiderako giltzak’ goiburua izango duen Bilboko manifestazioak ondoko helburua du: bertan milaka pertsonak giltzak hartzea beren eskuetan, presoen etxerako bidea, konponbidea eta bizikidetza irekiko dituzten giltzak, hain zuzen ere. Gizarte osoari zuzendu zaio Sar deialdia egiterakoan, «giza eskubideen defentsa helburutzat hartu nahi duten emakume eta gizon guztiei, edozein dela ere haien ideologia edo atxikipen politikoa».
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
