‘Judimendin bizi nahi dugu’ lemapean, etxebizitzaren arazoa salatuko du Batuta sareak
Egun osoko egitaraua eta manifestazioa antolatu dituzte maiatzaren 18an. through Alea.eus
Judimendin “duintasunez” bizi nahi dutelako, mobilizatzera deitu dute Batuta elkartasun sarean antolatutako auzoko bizilagunek; eta maiatzaren 18an egun osoko egitaraua eta manifestazioa antolatu dituzte. Goizean zehar mahai ingurua eta Etxebizitzak itota dinamikaren aurkezpena egingo dute. 15:00etan herri bazkaria antolatu dute bertako produktuekin. 18:00etan, berriz, Judimendiko parketik abiatuko da manifestazioa Judimendin bizi nahi dugu lemapean. Eta ostean, kontzertu ibiltari bat izango dute auzoan zehar.
Maiatzaren 18ko eguna aurkezteko agerraldia egin dute Batuta sareko lagunek; Aranburutarren kalean dagoen zelai batean egin dute, bertan luxuzko etxebizitzak eraikitzeko akordioa berretsi du udalak duela gutxi, azaldu dutenaren arabera, eta horregatik aukeratu dute toki hori, “espekulazioaren beste adibide bat azaleratzeko”. Etxebizitza “merkantzia”den bitartean, etxebizitzarako eskubidea ez dagoela bermatuta salatu dute.
Urtarriletik ekintza ezberdinak egin dituzte Batuta sarean antolatutako bizilagunek, eta etxebizitzaren inguruan dituzten arazo nagusiak identifikatu dituzte: kalean bizi diren auzokideak daudela atzeman dute; gazteak ezin direla auzoan emantzipatu; errolda eskubidea bermatuta ez duten auzokideak daudela; bizitzeko beharrezkoak diren oinarrizko ondasunak ez dituzten lagunak daude; eta ez dagoela familia nuklearraren eredutik kanpo dagoen etxebizitzarik.
JUDIMENDIN DUINTASUNEZ BIZI NAHI DUGU 🗣️
Gaur Judimendiko elkartasun sareko kideok maiatzaren 18an antolatu dugun egitaraua aurkeztu dugu 📢
Etxebizitzak itotzen gaituela salatuko dugu 🔥🔥 pic.twitter.com/TsLJqp5jzT
— BatutaSarea (@BatutaSare) May 9, 2024
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
