Amurrioko azken eraso matxistaren aurrean, autodefentsa feministarako deia egin du Otsemeakek
Azken eraso honen aurrean, autodefentsa feministarako deia egin du Otsemeak talde feministak. Elkarretaratzea egingo dute apirilaren 12an Amurrioko plazan.
Aurreko asteburuan, beste eraso matxista bat. Oraingoan, Amurrion. Hala eman du jakitera Otsemeak talde feministak. Jakinaraz dutenez, emakumeak salaketa jarrita zeukan, urruntze aginduarekin. “Beste eraso bat. Beste erasotzaile bat. Nazkatuta gaude”, adierazi dute ohar batean.
Hala ere, ez da lehenengo aldia mota honetako erasoak ematen direla. Izan ere, azken hilabeteotan Orozkon, Amurrion zein Laudion hauek jasan behar izan dituztela salatu dute.
Emakumeak, emakume izate hutsagatik, amaigabeko indarkeria matxista egunero pairatzen dutela gaitzetsi dute, “begirada, keinu edo gutxiespen sotilenetik, erailketaraino. Indarkeria matxistak ez du mugarik, bizi garen sistema kapitalista patriarkalaren funtzionamenduaren ezinbesteko tresna delako”.
“Indarkeria matxistak lehen mailako arazo politiko, sozial, ekonomiko eta kulturala izaten jarraitzen du; ez direlako modu isolatuan eta bakartuan ematen diren erasoak; bizi garen jendartearen antolaketa sexistak ahalbidetzen eta sustatzen duen indarkeriaren erabileraz ari gara”, adierazi dute Otsemeaketik.
Eraso hauen aurrean ez dira makurturik geldituko eta mobilizazioak deituko dituzte eskualdean. Autodefentsa feministarako deia egin dute neska gazteek, azken deialdi bat luzatuz: elkarretaratzea egingo dute gaur, apirilak 12, 19:00etan Amurrioko plazan.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
