“Nire hamaikakoa (edo nola ari naizen bizitzen euskaraldia)” -Garbiñe Agirre Urteaga-
Euskaraldian aurrera goazen honetan, ingurura begira jarri eta hamaika hizkuntza- eta bizitza-jarrera ezberdin identifikatu ditut. Hamaikakoa osatuko dut. Hamaikako honetan ez dago izen propiorik; baina badira.
1.- Hizkuntzaren erabilera ezagutzaren mailara eramaten ez dakigun arabarron (eta nago ez bakarrik arabarron) jarrerarekin kritiko, eta, bide horretatik, Euskaraldiarekin sinesgogor den lagun hori (baina, hala ere, paparrean ahobizi txapa daramana).
2.- Euskaraldia deseroso baina borondate osoz eta ekinez bizitzen ari den hori, nahiz eta noizean behin konfort gunera itzuli. Itxurakeria, hala ere, bada bazterretan.
3.- Euskaraldiarako talde-argazkian harro-harro atera nahi izan duen nerabe hori, bere konpromisoa plazaratuz (eutsiko ahal dio!).
4.- Gaztetasunak ematen duen kemenarekin Euskaraldiarako auzoko bileretan lokomotor lana eginez aritu dena, gainontzeko guztioi tiraka, aho-buru; eta leku berean buru-belarri bihotzez diharduen hori.
5.- Euskaraldia hasi baino lehen ere, beroketa ariketak egiten hasi zen gazte hura. Jauzia emango ote du hamabigarrenean?.
6.- Euskaraldiaren dinamika azaltzerakoan ahoa zabaldu, begiak txikitu, kopeta zimurtu eta burua aurrera-atzera darabilen amama xaharra, txaparik gabeko ahobizia.
7.- Euskaraldia auzoan zabaltzerakoan irribarrez hartu gaituen tabernari-dendari oro eta, bereziki, dendari kataluniar-euskaldun ahobizi-belarriprest hori.
8.- Belarripresten gomazko irudiaren azpian dantzan aritu den ahobizi hori.
9.- Oihanederren gu bezalako paraxutistak pazientziaz hartu gaituzten horiek.
10.- Ariketa honetan nire belarriprest aukera ulertu ez duen hura.
- Txaparik gabe, Euskaraldia aldamenetik bizitzen ari den euskaradun aktiboa. Ez gara denok, gehiago gara.
Amaitze aldera, Amets Arzallusi entzun niona jaso nahiko nuke: “Euskaraldiak bere hamabigarren egunean hartuko du zentzua eta indarra”, gure hizkuntza ohituretan nolabaiteko aldaera ematen denean.
Eta atrebentzia ez bada, ez bakarrik hizkuntza, kultura ohiturak ere erdigunean jarri beharko genituzke. Hori, ordea, beste ariketa bat litzateke.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
