Lehia bizia dago jokoan azken hilabeteotan Europan Israelgo Apartheid erregimenaren aurkako boikotaren zilegitasunaren kontura. Norgehiagokaren alde batean BDZ mugimendua eta palestinarren oinarrizko Giza Eskubideei lotutako aldarrikapenak; eta bestean Israelen aldeko lobbya, eta estatu sionistaren botere jarrera kolokan jartzen duen ororen aurkako haren erasoak. Batekoek 2005ean Palestinako gizarte zibileko 200 eregile zibiletik gorak zabaldutako eskakizunak dituzte xede; alegia; okupazioaren amaiera, Apartheid harresia bertan behera uztea, errefuxiatu palestinarrei jaioterrira bueltatzeko eskubidea bermatzea, eta Palestina historikoaren eremuan bizi diren persona guztien hiritartasun eskubide berberak onartzea; eta aldarri horiek bete artean boikota, desinbertsioak eta zigorrak baliatzen dituzte presio tresna gisa. Bestekoek, nazioarteko boikot kanpainaren eraginez Israelgo irudi publikoa eta interes ekonomioak gero eta kaltetuago daudela ikusirik, krimalizazio kanpainia abiatu dute Palestinarekiko elkartasun mugimenduaren kontra. Gauzak horrela, Israelen aldeko lobby horiek presioa egiten dihardute Europako hainbat erakundetan BDZ mugimendua ilegalizatu dezaten, eta zenbaitetan lortu ere lortu dute, izan ere, Frantzian, kasu, mugimendua legez kanpo uzteko lege promosamena martxan dago.

Eta, gauzak zer diren, Arabara ere iritsi dira tirabira horren zipriztinak. Iragan ekainaren 10ean Kanpezuko Udalbatzak, aho batez, BDZ kanpainiari atxikitzeko mozioa onartu eta Araban Israelekiko balizko edozein harremana hausten zuen lehenengo Udala bilakatu zen. Handik aste gutxitara auzitegietako jakinarazpena jaso zuten, ACOM izeneko erakunde baten salaketa zela medio, Udalaren aurkako auzi-prozesua abian zela. Accion y Comunicación Oriente Medio delako erakunde hori Estatuan Palestinarekiko elkartasun mozioak onartu dituzten Udalen aurka jarritako salaketa guztien atzean dago, eta goraka egiten badugu, Aznarren gorbernuko ekonomia ministerioan goi karguak izan zituzten pertsonaiak topatuko ditugu, ustez, irabazi-asmorik gabeko mamu-elkarte horren zuzendaritzan. Panorama horren aurrean kanpezukoek, aferak Udaleren ekonomiari ekar ziezaiokeen kaleari beldur, atzera egin zuten aho batez hartutako erabakian.

Baina lehia horren azken atala idazteke dago oraindik. Aste honetan Valentzia aldetik datorkigu albistea. 2015ean Rototom Sunsplash sona handiko musika jaialdian Matisyahu musiari juduaren kontzertua programatu zuten. Estatu batuarra izanagatik, abeslariak sostengu publikoa eman die sarri kolonoen mugimenduari eta Israelgo armadak burututako zenbait sarraskiri; hori dela eta, Valentziako BDZ taldeak boikot protokoloa abiarazi zuen artista sionistaren aurka. Aferak hautsak harrotu zituen hango hedabideetan. Azkenean kontzertua burutu bai, burutu zuten, baina publikoaren protestaldien artean. Urtebete eta erdi geroago salaketa iritsi zaie Palestinarekiko elkartasun 9 ekintzaileri. Gorroto delituak leporatzen dizkiete mozal legea medio. Aste honetan da abiatzekoa epaiketa. Auzibide horren atzean ere lobby sionistaren itzal luzea dago. Herrialde Katalanetako elkartasun mugimenduak sustengu kanpaina jarri du abian: Defensem Drets Humans -Giza Eskubideak Defenda Ditzagun- (https://defensemddhh.wordpress.com/). Sartu eta sinatu. Gure esku dago zilegitasun borroka honek batera edo bestera egitea. Palestinako herritarren Giza Eskubideen aldera; ala Israelgo Apartheid erregimenaren presio aparatu ekonomiko, juridiko eta mediatikoenera.