[Iritzia] “Zendu da diktadorea” – Iñaki Lazkano –
“Zendu da diktadorea”
– Iñaki Lazkano –
Mundu erdia erosketen sukarrak jota ostiral beltza ostiral santu bihurtzen zuen bitartean, Black Friday delakoan alegia, joan zitzaigun diktadorea, hil zitzaigun Fidel Castro.
Eta diktadoreak hiltzen direnean bezala herriak kaleak hartu zituen eta txanpainaz (edo ronez kasu honetan) ospatu zuen. Politikariak trantsiziorako erakundeak nola prestatu pentsatzen hasi ziren eta hurrengo egunean gobernu berria eratu zen.
Diktadorea hil eta bigarren egunean, igandean, dikatadurak zapladutako herri askatua La Habanako kaleak jendez gainezka eta musikaz blai festari ekin zion errejimenaren bukaera ospatzeko, eta erbesteratuei inbidia piska bat emateko, bide batez.
Fidelek arnasa hartzeari utzi eta irugarren egunean, astelehenarekin, munduko agintari demokratikoek tiranoaren soslaia madarikatu eta ongi etorri beroa eman zioten buruzagi erreformista berriei.
Gaur du laugarren eguna Kubak Fidel Castro Ruz hil zela eta turistak harrituta dabiltza La Habanako kaleetan barna, noraezean, gertatzen ari dena ulertu ezinik…. Emakume mexikar bati telebistan entzuna da honako hau:
“(…) Algo raro está pasando, ha muerto el dictador y la gente está triste”.
Milaka eta milaka herritar hurbildu dira Iraultzaren Plazara diktadoreari azken agurra ematera, errautsei ohore egitera eta errespetua azaltzera.
Ulertezina badirudi ere, Kubako herriak diktadorea maite zuen eta sekulako jende-ilarak osatu dituzte eguzkipean diktadoreari diosal egiteko.
Bihar izango du bostgarren dolu eguna eta Santiagorako bidean jarriko dira Fidel eta konpainia; uztailak 26 zituenean ekarri zuen askatasun haizeak eta azaroak 26koak eraman.
Kantuak dioen bezala,
Guretzat beti izango da 26!
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
