2009ko brigaden kanpaina hasi da eta Apirilaren 20ra arte izen
ematearen fasean gaude. Beherago brigadak pausoz-pauso atalean horren
berri zehatza daukazue.

Brigadak zer, nora, zertarako?

Brigadak aukera ezin hobea dira internazionalismoan murgiltzeko:
lehenik formakuntza eta prestakuntza saioen bidez, ondoren beste herri
bateko askapen mugimendu eta borrokak bertatik bertara ezagutuz eta
geurea ezagutzera emanez, eta azkenik, eta zinez garrantzitsuena,
berriz ere etxean Euskal Herria Internazionalistaren eraikuntzan
lagunduz.

Brigaden norakoak Askapenak urtean zehar jorratzen dituen ildoen
araberakoak dira, nagusiki 4: Palestina (Asia mendebaldea), Europa
(estaturik gabeko nazioak), Prozesu Bolivariarra eta Jatorrizko Herriak
(Abya-Yala).

Brigaden bidez beste herri horietan ditugun harremanak eta
elkartasun hariak sendotzen ditugu, brigadistek tokian tokiko mugimendu
eta borrokak lehen eskutik ezagutzen dituzte, eta gure herri-lagunek
geurea ere lehen eskutik ezagutzeko parada dute.

Beti azpimarratzen dugunez, maiz kontrakoa uste baliteke ere,
brigadistek gutxi eman eta asko jasotzen duzue: gure herri lagunen
elkartasuna, adeitasuna eta berotasuna, kasu gehien-gehienetan,
norabide bakarrekoa, izan ere, gure lagun horiek ezin izaten dute gure
herrian brigada bat egin, adibidez. Beraiek beren denbora, dedikazioa
eta maiz etxea ere jartzen dute euskaldunak joan gaitezen. Horregatik,
eta Askapenari brigadak antolatzea suposatzen dionagatik, brigadistek
bueltan konpromiso minimo batzuk hartu behar dituzue.

Brigadak pausuz pausu:

• Martxoaren 1etik Apirilaren 20ra: izen ematea, honako
  telefonoetara deitu behar duzue: Nafarroa 948 212271, Iparraldea
  (19tatik aitzina) 0559206957, Araba 945280847, Bizkaia 94 4332880,
  Gipuzkoa 943 552365. Bertan zuen izena, herria eta telefonoa utzi behar
  duzue eta geu jarriko gara kontaktuan zuekin. Beste aukera bat…
  emaila: brigadak@askapena.org, info@askapena.org.
• Maiatza eta Ekainean zehar formakuntza eta prestakuntza.
• Ekaina bukaeratik eta Iraila bitartean brigadak.
• Eta bueltan… LANERA

Hala Bedi babestu nahi duzu?

Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.

Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.

Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!