Uhintifadako denboraldi honetako azken atalean, eta irailera arteko etenaldi bat egin baino lehen, udarako gomendio literario bat ekarri nahi izan dizuegu. Horretarako, aurkeztu dizuegu “Palestina. El hilo de la memoria” liburua. Teresa Aranguren kazetariak 2004an idatzi zuen eta duela gutxi berrargitaratua izan da, ahatik, 19 urte geroago ez du inolako gaurkotasunik galdu. Aranguren eskarmentu handiko profesionala da eta ibilbide luzea egin du Ekialde Hurbilean. 1981an hasi zen Mundu Obrero argitalpenerako korrespontsal lanetan Israelek Libano inbaditu zuenean, eta eskualde horretan hurrengo harmarkadetan izan diren gatazka guztien berri eman du. Liburu honetan Arangurenek Palestinako kolonizazioaren historiaren errepasoa egin du; XIX. mendearen bukaeran mugimendu sionista hasi zenetik; garaiko indar kolonial boteretsuenarekin, Britania Handiarekin alegia, interes bertsuak izanik, Palestina historikoaren eremuan estatu judua ezarri zutenekotik pasata; gaur egun irauten duen herri palestinarra desagertarazteko garbiketa etniko kanpainia abian jarri zuten arte. Bere jardunean salatu du okerreko ideia bat dagoela, hau da, kontakizun historiko objetiboa egiteko parte guztien bertsioak bildu behar direla; baina haren esantean, hori ez da horrela, izan ere, badira bertsio batzuk errealitatea estaltzeko propio sortuak direnak. Haren ustez, errealitatea datuetan eta gertaera objetiboetan oinarritzen da, eta Palestinako kasuan hasieratik errealitatea estaltzea helburu zuen komunikazio estrategia bat egon da. Horixe da Israelen bertsioa, eta gaur egun mendebaldeak ontzat ematen duena, Palestinan herri bat dagoela ere ukatzen duen bertsioa. Bestalde, azaldu du historiagile arabiarrek hamarkadak daramatzatela herri palestinarraren aurkako garbiketa etnikoa salatzen, datu eta testigantza objetiboetan oinarrituta, baina mendebaldeko harropuzkeria koloniala dela-eta ez zitzaiela garrantzi handirik ematen. Gaur, aldiz, historialari israeldar batzuk ere hasi dira Israelen kontaketa historiko ofiziala desmuntatzen eta gauzak beste modu batez ikusten dira. Gogoratu ditu Palestinako historiako pasarte dramatiko batzuk, hala nola Deir Yasin edo Tanturako sarraskiak, eta aldarrikatu du ez direla ahanzturan galdu behar. Gainera, salatu du Israelgo estatuak baliabide asko erabiltzen dituela bere historiako parte hori ezkutatzeko.

Hala Bedi babestu nahi duzu?

Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.

Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.

Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!