Okela merke-merkea
Zenbatean dago haragi kiloa? Prezioak laskerketa zoroan goraka doazen momentu berean, badago haragi bat, giza haragia, inoiz baino merkeago kotizatzen duena nazioarteko merkatuetan. Hutsaren hurrengoa. Horixe da okelaren balioa haren gaineko azalak behar baino melanina kopuru handiagoa daukanean. Basapiztienetan basapiztienek ere gizakiek baino begirune handiagoa erakusten dute beren espeziekideekin. Melillako hesiaren aurrean poliziak, berdin dio zein kolore edo zein administrazioko soldatapean, kupidarik gabe eraildako gorpu metatuek; edota Texaseko errepide baten bazterrean kamioi baten barruan hil arte itotakoek; gizatasunarenak egin duela iragarri dute.
Nonbait Espainiako gobernurik aurrerakoiena denaren buruak goraipatu eta txalotu egin ditu sarraskia burutu duten uniformedunak. Gero, bere adierazpenek eragin duten eskandalua arindu nahian-edo saiatu da bere burua desenkusatzen, esandakoa esan zuenean triskantzaren irudiak ikusita ez zituela esanez, ordurako gure amak ere argazki lotsagarrien berri bazuen ere, lau haizetara zabaldu baitziren segapototik segapotora. Erantsi zuen gero Pedro Sanchezek bien jarrera ulertu behar dela, erasotzailearena eta erasotuarena, borreroarena eta biktimarena; biek dutela, haren esanetan, arrazoi parte bat. Eta hori guztia Europako mugak gogortuko eta gastu militarra areagotuko duen NATOren goibilkuraren atarian eta auskalo zein atzerri politikarako estrategiaren arabera. Hori bada gobernu ustez aurrerakoienaren buruaren jarrera zein ote da atzerakoienena? Ba al da 37 pertsona beltzen haragiagatik erruki izpirik niminoena ere ez erakustea baino jarrera arrazistagorik? Ba al da 37 pertsona beltz horien hiltzaileek euren arrazoiak izango zituztela iradokitzen duena baino faxistagorik?
Aurrekaririk gabeko inflazio garai hauetan bada zerbait inoiz baino merkeago ordaintzen dena, aurrerakoi hitzaren balioa. Historiak jarriko du nor bere tokian, Sanchez jauna.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
