Gasteizko Itaiak agerraldi jendetsua egin zuen atzo, hiriko taberna bateko komunetan gizon batek hainbat emakumeren irudiak grabatu dituela salatzeko. Itaiak azaldu duenez, erasoak jarraituak eta errepikakorrak izan dira, emakumeak horretaz ohartu eta erasotzaileari aurre egin zioten arte. Erasotzaileak urteetan zehar jarrera matxistak izan dituen arren, kirol esparruan izan duen posizio pribilegiatuaz baliatu da babestua egoteko, eta neska gazteekin lanean jarraitu du inpunitate osoz.

Gertakari hauek ez direla kasu isolatua seinalatu du Itaiak. Izan ere, irudi bidezko erasoak gero eta ohikoagoak dira. Besteak beste, Euskal Herriko hainbat txokotan emakumeen irudi sexualizatuak partekatzen dituzten foroak atzeman dira, eta garraio publikoan, aldageletan, komunetan zein lantokietan ere ematen dira halako erasoak

Era berean, horrelako kasuetan erasotzaileek duten inpunitatea salatu du Itaiak. Erasotzaileek anonimotasunean ezkutatzen dira, eta irudi sexualizatiak partekatzeko foroetan “elkar babestu eta txalotzen dira”, jarrera eta jokabide matxistak normalizatuz.

Bestalde, nabarmendu du erasotutako emakume askok ez dutela gertatutakoaren berri izaten, eta horrek salaketa sozialak zein juridikoak egiteko aukerak mugatzen dituela. Salaketa jartzen den kasuetan ere hainbat oztopo izaten direla azaldu du Itaiak, hala nola frogak baliogabetzea, emakumeen testigantzak zalantzan jartzea edo erasotzailea identifikatzeko zailtasunak.

Hala, emakume langileek jasaten dituzten erasoen erroa zein den mahaigaineratu du Itaiak: “Emakume langileon aurkako horrelako erasoak sistematikoki ematen badira, gizarte honetan subjektu zapaldu eta azpiratuak garelako da: etengabe gutxietsiak, sexualizatuak eta deshumanizatuak”. Gertatutakoa salatzeaz gain, erasotuak izan diren emakumeei babesa eta elkartasuna adierazi die. Erasotzaileen inpunitatearen eta haiek babesten dituzten konplizeen aurka egiteko deia zabaldu dute Itaiako kideek, baita halako egoerak salatzeko plazak betetzekoa ere.