Euskal Herrian aldarrikapenak egiteko hamaika borroka molde erabili izan dira. Aurreko larunbatean, Gure Eskuk, dantza, eta giro onaren bitartez bete zituen Euskal Herriko hiriburuetako plazak aldarriz.

“Zazpi jauziz, herri bat” ekimena burutu zuten euskal zazpi hiriburuetan. Igorri nahi zuten mezua argia da: “euskal nazioak jauzi bat egin behar du aurrera” eta horretarako Zazpi Jauzi dantza dantzatu zuten plazaz plaza.

Munduak zeharkatzen duen egoerari egin diote aipu, “olatu erreakzionarioari erantzuna” eman behar zaiola diote eta horretarako “Euskal Herria eraiki, eskubideak eraiki eta demokrazia eraiki” behar dela aldarrikatu dute. Josu Etxeburu, Gure Eskuko bozeramailearen hitzetan, “jauzi bat egin behar dugu geure nazio sena indartzeko, geure identitatea, hizkuntza eta kultura biziberritzeko, eta geure jendartearen eskubideak babestu eta zabaltzeko”.

Erakunde publikoak, alderdi politikoak eta eragile sozialak interpelatu ditu Gure Eskuk, eta “herri ikuspegiz, arduraz eta anbizioz jokatu behar dutela” gaineratu dute. Euskal enparantzetan egindako jauzi sinboliko hori “nazio jauzi” bihurtu nahi dute eta hori burutzea “denon ardura” dela azaldu dute.

Ekintzaren sinbolismoa azpimarratu nahi izan dute, izan ere, Euskal Herriko hiriburuetan honelako ekintza bat egiten den lehenengo aldia dela diote. Elkarrengandik hurbiltzeko balio izan duela diote antolatzaileek, zazpi lurraldeak elkarrengandik gertuago egoteko.