AskeRock jaialdiaren I. edizioa ospatu zuten larunbatean, ehunka lagun bilduz Mendizabalan
Gunea irekita egon zen 12 orduetan zortzi talde ezberdin pasa ziren oholtza gainetik, dispertsioaren salaketa musikaren bitartez elkarbanatuz. Antolakuntzatik eskerrak eman dizkiete bolondres eta parte hartzaile guztiei.
Aurreikuspenak bete ziren eta ehunka lagun hurbildu ziren larunbatean Mendizabalara, AskeRock elkartasun jaialdiaren I. edizioarekin gozatzeko. 12 ordu baino gehiago egon zen karpa irekita eta oholtza gainetik, guztira, zortzi talde ezberdin pasa ziren.
Ateak ireki zituzten unetik, etengabe egon zen jendea sartzen gunean, Bad Sound taldeak giroa berotzen zuen bitartean: txandetarako batzuk, kontzertuetaz gozatzeko beste asko… 18:00etan jende gehiena barruan zegoen, urriko egun hotzenetarikoari aurre egiteko prest. Kontzertu jendetsuenak Mafalda, Riot Propaganda eta Esne Beltza izan ziren. Azkenengo hauek, publikoa dantzan jarri zuten eszenatokitik jaitsi zirenean.
Musika, dantza, alkohola, janaria… eta elkartasuna. Izan ere, ezin da ahaztu elkartasun jaialdi bat izan zela larunbatekoa, dispertsio politikak Araban eragiten dituen gastuei aurre egiteko jaialdia.
Taldeek, dispertsio politika salatu zuten abesti eta abesti artean. Egun, 29 pertsona daude preso Araban. Batez beste, etxetik 660 kilometrotara daude; hau da, senide eta lagunek 1.300 kilometro baino gehiago egin behar dituzte bisita bakoitzeko. Beste modu batean esateko, 20.000€ suposatzen die dispertsioak senide eta lagunei urtero.
Sare sozialetan ere, eskerrak eman dizkiete bertaratu ziren, bolondres, senide, lagun, antolatzaile… guztiei. Gainera, irribarrea ez galtzeagatik ere eskerrak eman dizkiete euskal errepresaliatu politikoen senide eta lagunei.
AskeRockeko argazki galeria (Argazkiak: Iñigo Perez):
Ekitaldiko bideoa:
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
