Ceutako krisi humanitarioa baliatuz, eskuin muturreko alderdiek eta talde faxistek elkarretaratze arrazistak egingo dituzte bihar, irailaren 2an, Hego Euskal Herriko hiriburuetan. Azken asteotan migratzaileen kanpalekuak erasotu dituzte faxistek eta janaria zein bestelako laguntzak blokeatu dituzte. Testuinguru honetan, eskuin muturreko zenbait talde Ceutan ematen ari den krisi humanitarioa baliatzen ari dira diskurtso faxista eta arrazista normalizatzeko.

Gasteizen kasuan, PP alderdiak egin du deialdi arrazista. Honen aurrean, faxismoaren eta arrazakeriaren aurka mobilizatzeko deia zabaldu dute kolektibo ezberdinek, eta kontramobilizazioa antolatu dute “Ez nahastu etsaiz! Arazoa ez da miseria pairatzen duena, miseria sortzen duena baizik” eta “Faxismoari eta arrazakeriari arnasik ez!” lemapean. Elkarretaratzea bihar 20:00etan izango da, Gasteizko Udaletxearen aurrean.

Eragile hauek seinalatu dutenez, migranteak ez dira arazoa eta “miseria sortzen” duten agente guztiengan jarri behar da fokoa. Azaldu dutenez, Marokoko estatuak arma geopolitiko gisa erabili du bere langileria, eta orain faxistak egoera probesten ari dira ideia arrazistak zabaltzeko. Espainiar estatuaren arduragabekeria ere salatu dute: “krisi humanitario honen aurrean Espainiar estatuak ez du ezer egin pertsona migratzaileen baldintzak hobetzeko, eta honek egoera larritu besterik ez du egin”. Zentzu horretan, diskurtso arrazisten normalizazioari eta hedapenari aurre egitea ezinbestekoa dela azpimarratu dute, eta mobilizazio antifaxistara batzeko deia zabaldu dute.