Euskal presoen etxeratzearen aldeko elkartasun bira batek zeharkatuko du Araba
Igandea, uztailak 26, abiatuko da Sareren "Izan Bidea" dinamikaren baitako Arabako bira. Astebetez Arabakotxoko desberdinak zeharkatuko dituzte "euskal preso eta errefuxiatu politikoen etxeratzearen aldeko aktibazio sozialean sakontzeko helburuarekin".
Euskal Presoen egoerari aterabide emateko eta aktibazio sozialerako tresna izatea da SAREk martxan jarritako «Izan bidea, ibiltarien sarea» dinamikaren helburua. Dinamikaren muina nazio mailako erronka erraldoi batean kokatzen da: 3.127.326 kilometro osatzea, Euskal Herriak duen biztanle kopuruaren adina. «Hiru milioi kilometro egiten hasiko den hiru milioi biztanleko herri bat, xede batekin: bidea egitea; etxerako bidea, elkarbizitzarako bidea, bakerako bidea» hori da SAREk dinamikarekin irudikatu nahi duena.
Araban ere, kilometroz kilometro elkartasuna ehuntzea dute helburu larunbatean abiatuko den Arabako Birarekin. Aste bateko tartean Arabako herri eta eskualde desberdinak zeharkatuko ditu birak.
Informazio guneak jarriko dituzte dinamikaren nondik norakoak ezagutarazteko eta mendi martxak eta bestelako ekimenak ere antolatuko dituzte.
Hauek dira hurrengo egunetan Arabako Birak bisitatuko dituen herri eta eskualdeak:
- Uztailak 26: Otxandio, Zigoitia, Zuia eta Urkabustaitz
- Uztailak 27: Kanpezu eta Maeztu
- Uztailak 28: Añana
- Uztailak 29: Agurain, dulantzi eta Asparrena
- Uztailak 30: Laudio
- Uztailak 31: Amurrio, Bastida, Guardia, Samaniego eta Bilar
1182 elkartasun kilometro
Abuztuaren 1ean emango diote amaiera Arabako Birari Gasteizko Plaza Berrian egingo duten ekimen iraunkorrean, bertan 1182 kilometroko distantzia osatuz. Euskal Preso Politiko arabarrak bataz beste 593 kilometrotara daude sakabanatuta eta 1182 kilometro dira, hain zuzen, senide eta lagunek astebururo bisita bat egiteko bidaiatu beharreko joan etorriko distantzia.
Bizikleta estatikoekin osatuko dute distantzia hori. Goizeko 10:00etatik hasita txanda desberdinak banatuko dituzte 8 bizikleta estatikorekin espetxera bidaia irudikatzeko. Lehenengo 593 kilometroak osatuta, 13:00etan, Euskal Preso Politikoen senideekin ekitaldi bat egingo dute balizko bisitaren 40 minutuko iraupena irudikatuz eta, bazkalostean, etxerako bueltan dauden gainerako 593 kilometroak egingo dituzte.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
