Kaleak hartu eta herri eskolak antolatu dituzte Hispanitatearen jai egun arrotza salatzeko
Urriaren 12a iritsi da, Hispanitatearen Eguna edo Amerikako Jatorrizko Herien Erresistentzia Eguna. Eta honekin batera, aldarrikapenek hartu dituzte Arabako kaleak. Goizeko 10.00etatik aurrera, herri eskolak antolatu dituzte ikasle mugimenduek Gasteizen eta Aiaraldean. Eguerdian, ordea, inperialismoa gaitzetsi dute Askapenak Venezuelaren alde deitutako kontzentrazioan. Arratsaldean, Euskal Herria – Venezuela gizonezkoen futbol selekzioen partidua aitzaki, euskal zaletuek Mendizorrotzako harmailak hartuko dituzte ofizialtasunaren alde.
Espainiar inperialismoaren aurkako kontzentrazioa, Askapenak deituta
Ikasle Altxaren herri eskola bateratuak Auzolana Pilotalekuan
Goizeko 10.00etan, ikasleak hasi dira Hispanitatearen Eguna salatzeko lehenengo ekimenekin. Gasteizen, Ikasle Altxa mugimenduak herri eskola bateratuak antolatu ditu Auzolana Pilotalekuan. Bertan, 25 ikasle elkartu dira, eta sistema kapitalista azaltzeko antzerki batekin hasi dira, klase feminismoari buruzko hitzaldia egin aurretik. Hamaiketakoaren ostean, tailerrak egin dituzte eta, bukatzeko, Andra Mari Zuriaren plazako kontzentrazio anti-inperialistara abiatu dira zutabea osatuz.
Koldo Mitxelena eta Los Herraneko ikasleen herri eskola
Bestalde, Koldo Mitxelena eta Los Herran ikastetxetako ikasle mugimenduek, ‘Jai Egun Arrotzei planto!’ lelopean, Los Herranen antolatu dute herri eskola. 10.00etan, jokuekin hasi dira, mamian sartu baino lehen. Hispanitatearen Egunari buruzko hitzaldi bat egin dute, eta ondoren, horren inguruko jolasa. Aurrerago, hamaiketakoa egin dute, eta jarraian, urriaren 20an euskal preso politikoen eskubideen alde Donostian antolatutako manifestaziora deitzeko elkartasun argazkia atera dute. Goizarekin aurrera eginez, okupazioa eta patriarkatuaren sorrera izan dituzte hizpide mahainguru batean. Azkenik, zutabea osatu eta Askapenak deitutako kontzentrazioarekin bat egin dute ere.
Ikasle Abertzaleak-ek Laudion antolatutako herri eskola
Urtero bezala, Aiaraldean ere mobilizatu dira ikasleak. Alde batetik, Ikasleok Zorrotz mugimenduak Laudio ikastolan egin ditu herri eskolak. Bertan, ezagutza jolasak abiatu dituzte 11.00etan, eta tailer ezberdinak egiteko aukera izan dute, eskolei amaiera eman dion mural margoketa baino lehen. Bestalde, Ikasle Abertzaleak-ek deitutako herri eskolak Laudioko Gaztetxean egin dira.
Inperialismoaren kontra, Venezuelaren alde
Arabako Emakumeen Asanbladaren kontzentrazioa
Eguerdian, Arabako Emakumeen Asanbladak deituta, kolonialismoaren kontrako kontzentrazioa egin dute Andra Mari Zuriaren plazan. ‘Soberanía de cuerpos y territorios’ zioen pankartaren atzean, dozenaka lagun bildu dira, gaurko egunean “ospatzeko ezer ez” dagoela azpimarratuz.
Gaueko 20.45ean, Euskal Herria eta Venezuelaren arteko gizonezkoen futbol partidua jokatuko da Mendizorrotzan. Euskal Selekzioa Gasteizen jokatzen duen lehen aldia da, eta aldarrikapenek bere lekua izango dute ere, egun osoan zehar. Izan ere, 13.30ean, Gasteizko herri eskola guztiek bat egin dute Askapena eta euskal zaletuek deitutako mobilizazioarekin. ‘Inperialismoaren aurren herriok erresistentzia! Venezuela aurrera’ lelopean, ehundaka lagun bildu dira Andra Mari Zuriaren enparantzan.
Ofizialtasunaren aldarria erdialdetik Mendizorrotzaraino
Baina aldarrikapenak ez dira goizera mugatu eta arratsaldean ere jendetza atera da kalera. Oraingoan, euskal zaletuek ‘Ez gaude denok’ omenaldia egin dute Andra Mari Zuriaren plazan, euskal selekzioaren ofizialtasuna exijitzeko Mendizorrotzara abiatuko den kalejira baino lehen.
👉Urriaren 12 honetan, aldarrikapenek ez dute etenik #Gasteiz-en. Ofizialtasunaren aldeko kalejiraren aurretik euskal preso eta iheslari politikoen etxeratzearen aldeko ekitaldia https://t.co/E4pkTbqvcD pic.twitter.com/hTsf9DWNMZ
— Hala Bedi (@halabedi) October 12, 2018
Bertan, gaur Gasteizen egon ezin diren zaleak izan dituzte gogoan, tartean, Iñigo Cabacas bilbotarra eta Aitor Zabaleta gipuzkoarra. Altsasuko gazteen, euskal preso eta iheslari politikoen eta Espainiako selekzioaren aurkako mezuak ere presente egon dira.
200 eserleku baino gehiago hutsik utziko dituzte harmailan, zelaian egon ez diren euskal preso politikoen presentzia salatzeko https://t.co/E4pkTbqvcD pic.twitter.com/HTZq0N6PH9
— Hala Bedi (@halabedi) October 12, 2018
Jarraian, Mendizorrotzarako bidea hartu dute milaka lagunek, euskal selekzioen ofizialtasuna eskatzeko, bengalak, abestiak eta ikurrinak lagun.
Ekitaldia behin amaituta, ofizialtasunaren aldeko kalejira Mdndizorrotzaraino: Euskal Herria-Venezuela selekzioen partida ospatuko da bertan https://t.co/E4pkTbqvcD pic.twitter.com/jCVD7aM7h2
— Hala Bedi (@halabedi) October 12, 2018
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
