Salbuespenezko legediarekin amaitzeko manifestazioa deitu du Sare Herritarrak
Manifestazioa abuztuaren 3an, larunbatean, izango da, Gasteizko jaien atarian. "Mobilizazioarekin presoen auziari aterabidea eman eta elkarbizitzan aurrera egiteko guztion aktibazio eta konpromisoa beharrezkoa dela adierazi nahi dugu".
Andre Maria Zuriaren plazan egin du agerraldia Sare Herritarrak.
Sare Herritarrak agerraldia egin du Gasteizen abuztuaren 3an Arabako hiriburuan egingo duen manifestazioa aurkezteko.
Bozeramaileek adierazi dutenez, “Mobilizazioarekin presoen auziari aterabidea eman eta elkarbizitzan aurrera egiteko guztion aktibazio eta konpromisoa beharrezkoa dela adierazi nahi dugu”.
Eta, horretarako, maila instituzional, politiko, sindikalean eta sozialean lortu dituzten akordioak izan dituzte gogoan. “Instituzio hauetan jasotako babesek, euskal jendartearen %85a baino gehiago ordezkatzen dute”.
Bostgarren urteurreneko ekitaldian esandako hitzak ere izan dituzte gogoan: “Instituzioetan edo kalean, lan munduan edo unibertsitatean, kultura edo kirol arloan… Gero eta gehiago gara espetxe politika honekin amaitzeko aldarria egiten dugunak”.
Hiru eskaera nagusi
Eratzeke dagoen Espainiako Gobernuari ere mezu bat helarazi nahi izan diote: “Gobernu eratze arazoak ez daitezela aitzakia bihurtu egungo espetxe politika mantendu eta sufrimendua baino eragiten ez duen egoera hau luzatzeko”. Hori dela eta, “ausardia eta ardura” eskatu diote Gasteizko agerraldian Espainiako Gobernuari.
Zentzu honetan, hiru izan dira mahaiaren gainean jarri dituzten eskaerak: urruntze politikaren amaiera, larriki gaixo diren presoen etxeratzea eta gaur egungo egoera ahalbidetzen duen salbuespenezko legedia bertan behera geratzea.
Hitzordua larunbatean izango da, abuztuaren 3an: 19:00etan hasiko da manifestazioa, Andre Maria Zuriaren plazatik eta leloa ‘Korapiloak askatzeko unea da, denok batera presoak etxera!’ izango da.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
