Pobrezia Energetikoaren aurkako hainbat ekimen antolatu ditu “Derecho a Techo” plataformak
Duela urtebete sortu zen Gasteizko Etxebizitzaren Alde eta Gizarte Bazterkeriaren Aurkako Ekimenak hainbat ekintza antolatu ditu Pobrezia Energetikoaren aurkako astearen testuinguruan. Otsailaren 17an mobilizazioa burutuko dute Andra Mari Zuriaren Plazan.
derecho a techok iragan maiatzean egindako asanbladako irudia
Gasteizko Etxebizitzaren Alde eta Gizarte Bazterkeriaren Aurkako Ekimenak, “Derecho a Techo” plataformak, hainbat jarduera jarri ditu mahai-gainean Pobrezia Energetikoaren Aurkako Europako egunaren testuinguruan. Oinarrizko hornidurak lortzeko dauden gabeziei helduko diete egitasmoarekin.
Gaur, otsailaren 13, “Bizitegi-larrialdia eta energia-pobrezia” izenburupean hitzaldia antolatuko dute Aldabe Gizarte Etxean, arratsaldeko 19:00etan. Josep Babot izango da hizlaria, Bartzelonako PAHko kidea eta Pobrezia Energetikoaren Aurkako Aliantzako aholkulari juridikoa da Babot. Besteak beste Kataluinako gizarte-eragileek bultzatutako etxebizitzaren legearen inguruan mintzatuko da, Estatu mailan oinarrizko hornidurei dagokionean erreferente den legea.
Pobrezia Energetikoaren aurkako eguna
Otsailaren 17a, astelehena, Pobrezia Energetikoaren Aurkako Europako Egunaren testuinguruan elkarretaratzea deitu du “Derecho a Techo” plataformak, 19:30etan Andra Mari Zuriaren plazan.
Kalean lo egitera behartuak zeuden eta Olarizuko etxebizitza hutsetan bizitzea aukeratu zuten bizilagunak ekarri nahi dituzte gogora egun horretan, Gasteizko Udalak pertsona hauen beharrei erantzun beharrean kriminalizazio kanpaina bati ekin baitio, oinarrizko hornidura moztuz.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
