Peru Abarrategi Sarrionandia txapeldun 2022ko Arabako Bertsolari Txapelketan
Irudia: Arabako Bertsozale Elkartea
Peru Abarrategi Aramaioko bertsolariak jantzi du txapela Arabako Bertsolari Txapelketan. Europa Jauregian jokatu zuten finala larunbatean 6 bertsolarik, 600 ikusle ingururen aurrean. 608 punturekin irabazi zuen Abarrategik, Manex Agirre herrikidearekin buruz burukoan izan ostean.
Oihane Perea, Iñaki Viñaspre, Xabi Igoa eta Paula Amilburu bertsolariek 413’5, 410’5, 402 eta 384 puntu lortu zituzten, hurrenez hurren. Lehen aldiz izan da Amilburu finalean, eta bigarrenez Abarrategi. 1997an jaioa, finaleko gazteena izan da txapelduna. Iñaki Viñaspre aurreko edizioko txapelduna izan zen, eta Oihane Pereak, berriz, lau txapel jantzi ditu. Oraingo hau azken txapelketa izan dela esanez amaitu zuen saioa Pereak, azken agurrean.
Abarrategiri txapela Serapio Lopez Ortuetak jantzi zion, 1982an lehen bertso eskolen sortzaileetako bat izandakoak.
Azken agurrean Araban euskara zaintzeko dei eginez amaitu zuen Abarrategik saioa: ‘Eskakizun txikitxo bat aterako dut plazara/ nahiz Aramaixo ta Oion ez den berdin beharbada/ probintzi txiki honek du bere-berea euskara/ batzuek ahaztu arren gu ere euskaldun gara/ beraz konplexu guztiak doazela pikutara/ ama berdinak erditu baditu zazpi alaba (bis)/ merezi duen moduan zaindu zazue Araba’.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
