Apirilaren 6an, asteazkena, goizaldeko 2:50etan, Trebiñuko Enklabera iritsiko da Korrika. Obekuritik sartu eta Argantzunetik irtengo da Baxauri, Albaina, Fuidio, Argote, Pedruzo, Armentiako Bentak, Franko, Trebiñu eta Añastro zeharkatu ondoren. Goizeko 6:40ak arte 36 lekualdaketa egingo dira. Lehenengo kilometroa Enklabe barruan “Trebiñu Araba Da” plataformako kideek egingo dute, Obekurira sartuz.

Korrika Trebiñuko Enklabera iritsi dela eta, hainbat kultur jarduera antolatu dira Baxauri, Albaina eta Trebiñun. Ekitaldi egutegi hau asteazken arratsaldean amaituko da Argantzunen. Korrika Txikia ere egingo dute arratsaldeko 5,30etatik aurrera, ondoren txokolatada herrikoi bat eta “Diskorrika” izeneko musika emanaldia Plentziako Arma Cool Tour taldearekin, animazio tailerretan espezializatua. Euskal Dj eta animatzaile baten eskutik, musika eta dantza giro alaian murgilduko dira bertaratzen diren guztiak, aurreko edizioetako Korrikaren arrakastekin eta euskal kantuekin dantzan, saio ero eta dibertigarri batean. Festa horrekin amaituko da Trebiñuko Korrika Kulturala.

Korrikak, bere aldetik, bere ibilbidea jarraituko du Euskal Herri osoan zehar, igande honetan, apirilak 10, Donostian amaitu arte. Horretaz gain, Arrosa Sareko talde bat Korrikako espedizioan egongo da Arabako ibilbide osoan zehar. Hori dela eta, zuzeneko konexioak egingo ditugu magazinetan.

Hala Bedi babestu nahi duzu?

Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.

Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.

Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!