Kondena eten diote Oier Gomezi, baina euroaginduen zain geratu da orain
Larriki gaixorik dagoen kondena etetea erabaki dute Frantziako epaitegiek, baina, momentuz, ez da aske geratuko. Asteazkenean izango da euroaginduen inguruko ebazpena. Sare herritarrak egun osorako gune bat antolatu du Gasteizen.
Sententziak hainbat gako utzi ditu:
- ETAren armagabetzea eta Oierren osasun egoera latza kontutan izan dute kondena eteteko: Gomezek ez dauka “berrerortzeko” aukerarik.
- “Eszenatoki berria” kontutan hartzen duen lehenengo sententzia da.
Apirilaren 19an burutu zen bistan, fiskaltza kondena etetearen alde agertu zen, eta bost egun beranduago iritsi da kondena etetearen erabakia. Hala ere, momentuz, preso gasteiztarra ez da aske geratuko. Hiru euroagindu ditu zain: bi Espainian eta bat Portugalen. Oier Gomezen abokatuak, Maritxu Paulus Basurkok, adierazi duenez, “euroaginduak etetea lortzen ez bada, ez da ezer aldatuko”.
Oiertxo SOS Elkartasun Eguneko ekitaldia
Asteazkenean espero da Gomezen aurkako euroaginduen inuguruko epaia eta erabakia. Sare herritarrak egitarau oparoa antolatu du egun horretarako: 12:00etatik 20:00ak arte Korreoseko enparantzan egongo dira, erabakia jakin arte. Zentzu horretan, eragile ezberdinak pasako dira ordu erdiro egingo den kontzentraziotik. Hala ere, bi hitzordu nabarmendu dituzte:
- 12:30tan elkarretaratze masiboa deitu dute.
- 19:00etatik aurrera: euroaginduen ebazpenaren jarraipena.
Gainera, Sare herritarrak ere manifestazio nazionala burutuko du Maiatzaren 6an Gasteizen, larriki gaixo dauden preso guztien askatasuna eskatzeko, tartean, Gomez eta Lopez de Abetxuko gasteiztarrena. Oiertxo SOS plataformak, aldiz, elkartasun egun arrakastatsua ospatu zuen larunbatean Gasteizen; horren erakusle, eguneko irudiak.
Balorazioak
Sare Gasteizek adierazi duenez, “presio sozialari esker” lortu da. Egoera ez errepikatzeko, maiatzaren 6an Gasteizen burutuko den manifestazio nazionalean parte hartzeko deia egin dute: 17:30tan abiatuko da, Iparralde gizarte – etxetik.
Oiertxo SOS plataformak euskal preso politikoei ezartzen zaizkien neurriak salatu ditu, epailearen balorazioa modu positiboan baloratuz eta “arrakasta kolektiboa” izan dela nabarmenduz.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
