Kalitatezko Lehen Mailako Arreta defendatzeko mobilizazioak egingo dituzte ostegunean
Lehen Mailako Arretako langileek protestak egingo dituzte ostegunean Osasun Zentroen sarreretan, lan-karga "onartezina" eta Osasun Sailak ezarri dituen neurri berriak salatzeko.
Azaroaren 25eko prentsaurrekoko irudia.
Bihar, osteguna, protesta egingo dute Arabako Lehen Arrerako Osasun Zentroetako langileek. Lehen Mailako Arretako Batzordeko Sindikatuek deituta, Lantokietako ateetara aterako dira eguerdiko 13:00etan, “jasaten ari diren tratu txarrak” salatu asmoz. Izan ere, Batzordeak azaldu du “onartezina” dela Osasun Zentroak pairatzen ari diren lan-karga, eta ez daudela ados Osasun Sailak ezarri dituen neurri berriekin.
Lan-karga “onartezina”
Joan den azaroaren 25ean, prentsaurreko batean, Lehen Mailako Arretako Batzordeak Osakidetzako langileei ematen zaien “tratu txarra” salatu zuen, Osasun Zentroetako langileena bereziki. Egoerak, azaldu dutenez, okerrera egin du: “Gaur egun, osasun-larrialdi berri honekin eta gora egiten ari den inzidentziarekin, Lehen Mailako Arretako langileek bere lanarekin jarraitzen dute aurretik zegoen langile kopuru doitu berberarekin, batzuetan, gutxiago. Salatzen ari garen bezala, osasun zentroetan aurretik egin ohi ziren lan-kargei, pandemiak eragindako karga berriak gehitu behar zaizkie, eta eragin handiko uneetan, gaur egungoa bezala, osasun-profesionalen agendak eta administrazio arloak gainkargatzen dira”.
Osasun Sailak ezarritako neurri berrien aurka
Covid-19ak eragindako pandemiaren “seigarren olatua” dela eta, hainbat neurri ezarri ditu Osasun Sailak. Besteak beste, “premia berezirik ez duten” Lehen Mailako Arretako kontsultak atzeratuko dituztela jakinarazi du Gotzone Sagarduy Osasun Sailburuak.
Lehen Arretako langileek azaldu dute neurri horrek gaixotasun kronikoak dituzten pazienteen jarraipenari eragiten diola eta areagotu egingo dituela herritarren arteko osasun-desberdintasunak. Itxarote-zerrendak ere nabarmen handituko dira.
“Konponbidea ez da osasun zentroetan asistentziari murrizketak ezartzea, baizik eta giza-baliabideak eta azpiegiturak areagotzea Covidaren seigarren olatu honek dakarren jarduera osasun zentroetatik kanpo egin dadin, eta zentroek duela hilabete batzuetatik hona egin ezin duten osasuna sustatzeko eta gaixotasuna prebenitzeko jarduerak garatu ahal izan dezaten”, argitu du Lehen Arretako Batzordeak.
Egoera horren aurrean, “borrokatzen jarraitzeko” deia egin dute eta osteguneko mobilizazioetara batzekoa, Arabako osasun zentroetako asistentzia hobetu dadin eta “biztanleriak behar duen aren araberako kalitatea izan dezan; kalitatezkoa, integrala, hurbila eta doakoa”.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
