Indarrez ekingo dio urte berriari Muinoko Hotsak egitasmoak
Bi data berri aurkeztu ditu Muinoko Hotsak egitasmoak: urtarrilaren 31a eta martxoaren 14a. Gaztetxeko oholtza gainean, berriz, Lepora, Lisabö, Red Iron Squad eta Sexty Sexers taldeak.
Red Iron Squad gasteiztarrak 2017ko Hala Bedi rock jaialdian
Urte berriari gogotsu helduko dio Muinoko Hotsak egitasmoak, Gasteizko Gaztetxearen eta Hala Bedi irratiaren arteko elkarlanak. Urteko lehenengo bi kontzertuen datak eta eszenatokira igoko diren lau banden izenak iragarri dituzte. Urtarrilaren 31an Lepora eta Lisabö taldeek eskainiko dute ikuskizuna, martxoaren 14an, aldiz, Red Iron Squad-ek eta Sexty Sexer-ek.
Urtarrileko kontzertuko sarrerak aste honetan jarriko dituzte salgai Hala Bedi tabernan. Lepora eta Lisabö izango dira ostiral gauari soinu banda jartzeaz arduratuko direnak. Leproa talde gasteiztarrak estreineko kontzertua du urtarrilaren 31koa. Kashbad, Iont, Same Old edota Libe taldeetan aritutako musikariek osatuko proiektu berria da. Lisabö ibilbide luzea du eszenan, 1998an sortu zen banda Irunen eta rock esperimentala dute ardatz, post-rock soinuetatik gertu dabilena.
Bigarren data bat ere aurreratu dute dagoeneko, martxoaren 14a. Gau horretan Red Iron Squad talde gasteiztarrak Sexty Sexers-ekin elkarbanatuko du muinoko oholtza. Red Iron Squad bostekoak 2016aen ekin zion bere ibilbideari eta lehen lan luzea argitaratu berritan dator gaztetxera: «GO». Sexty Sexers, ordea, hogei urteko esperientziarekin dator Gasteizera. 2001ean Nafarroan sortutako bostekoa rock musikaren erreferente bilakatu da.
Kaixo, MMXX!
🔴Urtarrilaren 31n
➡️ LEPORA & LISABÖ
Sarrerak, aste honetan, @halabedi tabernan
🔴Martxoaren 14an
➡️ RED IRON SQUAD & SEXTY SEXERS
Sarrerak, otsailean, leku berean.
Kontzertu guztiak, nola ez, @gasteizkogaztetxean. pic.twitter.com/EK15W1AhOa
— Muinoko Hotsak (@MuinokoHotsak) January 13, 2020
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
