Gasteizko Gaztetxeak aste honetan ekingo dio ikasturte berriari
Muinoko Hotsak irailaren 21ean itzuliko da oholtza gainera, Libe eta Jupiter Jon taldeekin. OkupaTU Gasteiz dinamikako kideek urriaren 6ko eguna berotzeko jaialdia egingo dute datorren ostegunean.
Gaztetxeko liburuaren aurkezpena, aurreko ikasturtean
Ia hilabete bat itxita egon ostean, Gasteizko Gaztetxeak ateak irekiko ditu berriz ostegunean, irailaren 13an. Egun horretan, Pareten Oihuak jaialdia egongo da, ostegun unibertsitarioekin hasiz.
Gaztetxearen ate irekierarekin batera ekingo dio ikasturte berriari Muinoko Hotsakek, Hala Bedirekin elkarlanean. Irailaren 21ean Libe eta Jupiter Jon taldeak egongo dira oholtzaren gainean, udazkenari ongi etorria emateko: urriaren 20an, berriz, Anestesiak joko du muinoko etxean.
Horretaz gain, asko ekimen gehiago: OkupaTU Gasteiz Eguna berotzeko jaialdia hurrengo ostegunean, Erdi Aroko azoka hilabeteko azken asteburuan zehar edo Resurrection Fest.
Eta bide batez, urriaren 6rako deialdia: egun horretan OkupaTU Gasteiz Eguna ospatuko dute Hala Bedik, Gaztetxeak, Auzolana Pilotalekuak eta Errekaleorrek. Dinamikako kideek adierazi dutenez, baliteke egitarauak aldaketatxo batzuk izatea eta hori dela eta kartel berri bat mugitu dute sarean. “Gure proiektuetatik pasa direnak elkartu eta egindako lana aldarrikatzeko jaia izango da urriaren 6koa”, adierazi zuten Amets Garrues eta Matixa Oterok Araba Hizpiden.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
